Kremlniñ kontroli altında olğan Qırım Yuqarı mahkemesi, Bağçasaraydaki «Hizb ut-Tahrir işi»niñ üç figurantı – Timur İbragimov, Server Zekiryayev ve Ernes Ametovnıñ tahqiqat izolâtorında tutuluv muddetleriniñ uzatılmasına qarşı apellâtsiyalarını baqılmaqtan alıp taşladı ve materialnı kene birinci maqam mahkemesine, eksikliklerini yoq etmek içün yolladı. Bunı mayıs 17-de Qırım.Aqiqat muhbiri yaza.
Zekiryayevniñ advokatı Aleksey Ladin: «Bugün Kyivskiy rayon mahkemesiniñ qararına qarşı appelâtsion şikâyetlerimizniñ baqılması içün nevbetteki teşebbüs yapıldı ve material ardı-sıra üçünci kere baqılmaqtan alıp taşlandı ve birinci maqam mahkemesine, ekskliklerini yoq etmek içün yollanıldı», – dep añlattı.
İşniñ baqılmaqtan alıp taşlanması, Timur İbragimov içün, imayecisi bergen apellâtsion şikâyetniñ qırımtatar tiline tercime etilmegeni sebebinden oldı. Aynı zamanda, oturışuvnıñ başında advokatlar akem hanımğa bunı bildirgende o, işte qabaatlanğannıñ senedi bar, ve oña köre o, şikâyetniñ kopiyasını tercime ile beraber aldı, dep cevap berdi.
Ladin: «İbragimov mahkemege, tercime almağanını söyledi. Terciman Salâdinov oturışuvda, apellâtsion şikâyetni tercime etmegenini bildirdi. Men biraz şaştım: terciman tarafından tercime etilmegen şikâyetniñ alınması aqqında senet nasıl olmaq mümkün?», – dep ilâve etti.
Oturışuv qapalı şekilde keçti. İlân etilüvge yalıñız üç kişi yiberildi – er bir qabaatlanğannıñ birer aqrabası.
«Başta akem hanım, açıq şekilde ilân etilmesini red etti, lâkin soñundan bir kereden fikirni deñiştirdi. Mende bir sıra sual bar: ne içün birer kişi? ne içün mutlaqa aqrabası? bu qaysı bir norma esasında yapıla? Adaletlik printsipiniñ bozulması aşkârdır», – dep yekün çekti Ladin.
Ernes Ametovnıñ advokatı Ayder Azamatov, qabaatlanğanlarnıñ tahqiqat izolâtorında 5 ay bulunğanlarına baqmadan, olarnen iç bir tahqiqat tedbiriniñ keçirilmegenini ilâve etti.
Azamatov: «Olarnı sadece mabüs etip tuta ve protsessual kâğıtbazlıq yapalar. Endi eki aydan ziyade, mart 9-dan başlap, Yuqarı mahkeme apellâtsion şikâyetlerimizni baqıp olamay. Al-azırda olarğa tevqif muddeti iyün 9-ğa qadar uzatıldı. Biz, tahqiqatnıñ, apellâtsiyanıñ neticelerini bile beklemeyip, nevbetteki uzatuv soraycağını bekleymiz», – dedi.
Daa evel, mayıs 15-te Zekiryayev, İbragimov ve Ametovğa dair oturışuv, İbragimov içün tercimanlıq hizmetini bergen qırımtatar tiline tercimannıñ olmaması sebebinden başqa künge avuştırıldı. Aynı şu künü imaye, İbragimovnıñ advokatı tarafından berilgen şikâyetniñ qırımtatar tiline tercime etilmegenini qayd etti.
2017 senesiniñ oktâbrinde Rusiye telükesizlik hadimleri Bağçasaraynıñ altı sakinini yaqaladı. Bular – Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametov. FSB olarnı Rusiye ve onıñ tarafından ilhaq etilgen Qırımda yasaq etilgen «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir» halqara siyasiy İslâm teşkilâtınıñ vekilleri öz vazifesini, bütün musulman devletleriniñ bir İslam hilâfeti içinde birleştirilmesi, dep köstereler. Lâkin olar buña irişmek içün terroristik usullarnıñ qullanılmasını red ete ve Rusiyede aqsız yerde taqip etilgenlerini aytalar. 2003 senesinde Rusiyeniñ Yuqarı mahkemesi «Hizb ut-Tahrir»ni, «terroristik» tanılğan 15 birleşmeniñ cedveline kirsetip, yasaq etti.
«Hizb ut-Tahrir işi» boyunca tevqif ve mahküm etilgen Qırım sakinleriniñ qorçalayıcıları, taqipniñ diniy alâmetke köre yapılğanını tüşüne. Advokatlar, Rusiye uquqqoruyıcı organları tarafından bu iş boyunca taqip etilgenler esasen qırımtatarlar olğanını ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri taqip etilgenini qayd eteler. Halqara uquq, işğal etilgen territoriyada işğalci devletniñ qanunlarını tatbiq etmekni yasaq ete.
