Gürcistan Baş naziri İrakli Garibaşvili Ukrainağa resmiy ziyaretnen keldi. Gürcistan delegatsiyası «Qırım platforması» forumında da iştirak etecek.
Ziyaretniñ eki künlik programmasınıñ esas maqsadı Gürcistan baş naziriniñ, Tış işler naziri David Zalkalianiniñ «Qırım platforması» sammitinde iştiragidir, dep haber ete Azatlıq.Radiosı.
«Gürcistan baş naziri İrakli Garibaşvilini Ukrainada selâmlamayım. Lviv ve Kyivde büyük bir programma bekley: telükesizlik, ticaret, iqtisadiy, energetik, turistik muzakereler ve daa çoq diger mesele. Gürcistan delegatsiyası Qırım platformasınıñ tesis sammitinde iştirak etecek. Biz Gürcistannıñ halqra seviyede tanılğan sıñırlarında topraq bütünligi ve suverenitetini desteklemege devam etemiz. Bizge de aynı destek içün ortaqlarımızğa minnetlarmız», – dep yazdı Ukraina baş naziri Denis Şmıgal.
Avgustnıñ 23-nde Kyivde keçirilecek «Qırım platforması» sammitinde Amerika Birleşken Devletleriniñ temsilcisi Energetika naziri Jennifer Granholm olacaq.
Ukraina TİN Dmıtro Kuleba avgustnıñ 23-nde Kyivde keçirilecek «Qırım platforması» sammiti iştirakçileriniñ tolu cedvelini ilân etti.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Avgustnıñ 12-nde Kreml kontrolindeki Qırım Nazirler şurasınıñ reis muavini, Rusiye prezidenti yanındaki Qırım vekili Georgiy Muradov «Qırım platformasınıñ» iştirakçilerini «ağır aqibetler» bekley, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.