Ukraina TİN Dmıtro Kuleba avgustnıñ 23-nde Kyivde keçirilecek «Qırım platforması»sammiti iştirakçileriniñ tolu cedvelini ilân etti.
İştirakçilerniñ cedvelini nazir avgustnıñ 19-nda briıing vaqtında bildirdi.
Onıñ malümatına köre, sammitte 44 memleket ve halqara teşkilât iştirak etecek, olarnıñ arasında 14 devlet, ükümet ve AB başları.
«Bazı kiçik deñişmeler ola bile, amma iştirakçilerniñ esas erkânı artfq bar. Böylece, avgustnıñ 23-nde "Qırım platforması"nıñ tesisçileri 44 devlet ve halqara teşkilât olacaq. Olarnıñ arasında 14 devlet, ükümet ve AB başları. Litvaniya, Letoniya, Estoniya, Poloniya, Slovakiya, Macaristan, Moldova, Sloveniya, Finlâdiyanı devlet başları temsil etecek. Daa Avropa Şurasnıñ reberi iştirak etecek.Gürcistan, Romaniya, Horvatiya, İsveçiyanı baş nazirler, İsviçre ve Çehiyanı parlament reberleri temsil etecek.14 memlekteni Tış işler nazirleri temsil etecek - Türkiye, Frenkistan, Almaniya, İspaniya, İtaliya, Belçika, Avstriya. Felemenk, Lüksemburg, İrlandiya, Daniya, Bulğaristan, Çernogoriya, Şimaliy Makedoniya. Büyük Britaniya ve Portugaliyanı Mudafaa nazirleri temsil etecek. Amerikanı ABD prezidentiniñ temsilcisi, ükümet azası, Naqliyat naziri temsil etecek. Norveçni TİN devlet kâtibi temsil etecek. Daa halqara teşkilâtlar ve Avropa komissiyası iştirak etecek. Soñkisini Valdis Dombrovskis temsil etecek. NATO-nı Baş kâtipniñ muavini, Avropa Şurasını Baş kâtip, GUAM-nı Baş kâtip temsil etecek. Yedi memlekteni elçileri temsil etecek - Yañı Zelandiya, Malta, Yaponiya, Avstraliya, Qıbrız, Kanada ve Yunanistan» – dedi Kuleba.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Avgustnıñ 12-nde Kreml kontrolindeki Qırım Nazirler şurasınıñ reis muavini, Rusiye prezidenti yanındaki Qırım vekili Georgiy Muradov «Qırım platformasınıñ» iştirakçilerini «ağır aqibetler» bekley, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
