Haqara toplulıq Qırımdaki vaziyetni unutmamalı ve bunı yapmaq içün «Qırım platforması»yardım etecek. Bunı Azatlıq Radiosına Ukrainada ABD-niñ meselelerinden muvaqqat vekâletlisi, Avropa ve Avrasiya meselelerinden ABD devlet kâtibiniñ yardımcısınıñ muavini George Kent ayttı.
«Halqara toplulıq, diplomatlar Qrımdaki vaziyet aqqında iç bir vaqıt unutmamalılar. Çünki olıp çıqqanı, BMT Telükesizlik Şurasınıñ daimiy azası aldı ve omşu memleketniñ qısmını zapt etkeni bu unikal bir şey oldı. Qırım platforması, diplomatlar ve memleketler tek Donbas, Pridnestrovye, Abhazistan ve Cenübiy Ösetiya aqqında degil, amma daa Qırım aqqında aytıp başlaması içün ilk adımdır», – dedi o.
Onıñ sözlerine köre, «Qırım platforması» teşebbüsi – yalıñız diplomatiya ve memleket liderleriniñ meselesi degil, amma ekspertlerniñ de meselesi.
«Çünki Rusiye tarafından pek büyük bir yalan haberler dalğası bar. Ve ukrain ekspertleriniñ diger ekspertlernen, tek ABD ve Kanadakiler ile degil, amma Avropadakiler ile de işbirlik etkenleri pek müimdir. Çünki olar da Moskvanıñ mevamından degil, Ukraina tarafından Qırımdaki vaziyetni añlamalılar», – dep qayd etti Kent.
Mayısnıñ 20-nde Ukraina prezidenti Volodımır Zelenskıy «Qırım platforması» sammitine 30 memleketniñ vekilleri kelecek, dep ayttı. Onıñ bildirgenine köre, Rusiye «Qırım platformasını» pek ağır yanaşa.
Ukraina prezidenti ofisiniñ reber muavini İğor Jovkva «Qırım platforması» boyunca halqara sammit Ukrainada 2021 senesi avgustnıñ 23-nde olacaq, dep bildirgen edi.
Ukraina Tış işler naziriniñ birinci muavini Emine Ceppar «Dom»telekanalınıñ yayınında Ukraina Tış işler nazirligi avgustnıñ 23-nde olacaq «Qırım platformasında» iştirak etecegini tasdıqlağan memleket sayısını aydınlatmağa daa planlaştırmay, dep bildirdi. Onıñ aytqanına köre, bu qarar Rusiye tirengeni içün qabul etildi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
«Qırım platforması»
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
