Anğara köyündeki «gaz borusında diversiya» davasınıñ mabüsi Aziz Ahtemovnıñ ömür arqadaşı Adilege dört ay içinde ilk sefer aqayını Aqmescit SİZOsında ziyaret etmesine izin berildi. Bu aqta o, Facebookta bildirdi.
Onıñ aytqanına köre, aqayınen körüşmek içün altı saat bekledi.
«Aziz bir qarar körüne, özüni baqa. Yahşı bir şey eşitmek ümütinen bir haber barmı, dep soradı. Tutulğan kününden berli Aziz pek optimistik, küçlü, ruhtan tüşmey, yüzünde tebessüm sönmey edi. Amma tünevin bu tebessümde közlerinde keder ve ne qadar sağınğanını kördim. Şunıñ içün oquğan er kesten Azizge bir-eki satır yazıp, qoltutmağa rica etem. Anda, apiste, mında onı unutmağanımız pek müim. Ve tek Aziz Ahtemovğa degil, adaletsizlikke oğrağan bütün siyasiy mabüslerge qoltutıñız. Selâmlaşmaq, nasıl olğanlarını soramaq ve sağlıq ve sabır tilemek», – dep yazdı Adile Ahtemova.
Anğara köyündeki «gaz borusında diversiya» davasınıñ mabüsi Asan Ahtemovnıñ ömür arqadaşı Repika da aqayını Aqmescit SİZOsında ziyaret etti, dep bildirdi.
Ağa-qardaş Asan ve Aziz Ahtemovlar eñ az 2022 senesi yanvarniñ 23-ne qadar SİZOda qalacaqlar.
Aziz Ahtemov oña bütün mektüpler ketirilmey, dep haber etken edi. O, SİZOda tutuv şaraitlerini de şikâyet etken edi.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
