Yaltadaki «Hizb ut-Tahrir davasınıñ» mabüsi Müslim Aliyevniñ qızı, qırımtatar faali Gülsum Aliyeva qıdırılğan şahıslar cedvelinden çıqarıldı. Aynı vaqıtta, o, Rosfinmonitoringniñ «ekstremist faaliyeti ya da terrorizmge alâqası olğanlarnıñ» cedvelinde qala. Bu aqta advokat Aleksey Ladin Qırım.Aqiqat mühbirine tarif etti.
Advokatnıñ aytqanına köre, bu 2020 senesi yanvar ayında esas Ukraina ile memuriy sıñırda Aliyevanıñ tutulmasına alâqası olğan quvetçilerni mesüliyetke çekmege rica etken şikâyetine Qırımdaki Rusiye FSBsiniñ cevabı oldı.
«Qırımnıñ İç işler naziri ve Qırımdaki FSB idaresiniñ reberleri adına bergen şikâyetlerimde Gülsumnıñ memuriy sıñırda bir qaç kere tutuluvında qabaatlı olğan şahıslarnı mesüliyetke çekmege rica etken edim. O vaqıt da Qırım İç işler nazirinden ve FSB generalından Gülsum qıdırılamı ve ekstremist ve terroristler cedvelinde qalamı dep bildirmelerini rica ettim», – dep ayttı advokat.
Ladinniñ aytqanına köre, Qırımdaki Rusiye İç işler nazirliginiñ idaresi onıñ şikâyetini yerli FSB idaresine yolladı, anda ise advokatnıñ talabına qulaq asmadılar.
«Aliyevanı eki kere tutqan quvetçilerni celp etmek talaplarıma FSB bergen cevapqa biz razı degilmiz. Tam bir cevap da yoq – talaplarım körmemezlikke uruldı, tek Gülsum qıdırılamı sualine cevap berildi. Şikâyetni FSBge yollağan İç işler nazirliginiñ areketlerini ve FSBniñ areketsizligi şikâyet etecekmiz», – dep añlattı o.
Advokat, Gülsum Aliyevanıñ Rosfinmonitoring cedvelinden çıqarılmasına irişmege niyetlene, dep qoştı.
Yanvarniñ 13-nde Aliyeva Qırımdan çıqmağa tırışqanda tutulıp, Ermeni Bazar politsiya bölügine ketirildi. Beş saattan soñ Rusiye quvetçileri onı yiberdi. Advokat Edem Semedlâyevniñ aytqanına köre, Aliyeva «alâ daa cinaiy qıdıruvda buluna». Advokat, Gülsumnıñ yanında oña qarşı dava qapatılğanına dair bütün vesiqalar bar edi, dep bildirdi.
Rosfinmonitoring saytına köre, Gülsum Aliyeva ekstremist faaliyeti ya da terrorizm ile alâqaları bar olğanına dair malümat olğan teşkilât ve şahıslar cedvelinde 766 nomera altında buluna.
Gülsum Aliyeva Qırım ve Herson vilâyetiniñ memuriy sıñırında tutulğan soñ Ermeni Bazardaki Rusiye politsiyasınıñ bölügine alıp ketirildi. Advokatnıñ aytqanına köre, Gülsumnıñ yanında oña qarşı cinaiy dava qapatılğanına dair bütün vesiqaları bar edi.
«Qırım birdemligi» birleşmesiniñ malümatına köre, Aliyeva tibbiy vesiqalarnı resmiyleştirmek ve ihtisasiy tibbiy mesleat almaq içün Hersonğa kete edi.
2018 senesi iyül ayında Rusiye telükesizlik organlarınıñ hadimleri Yaltadaki «Hizb ut-Tahrir davasınıñ» iştirakçisi Muslim Aliyevniñ evinde «tahqiqat tedbirler» keçirgeni aqqında haber etilgen edi. Daa soñra belli olğanına köre, onıñ üyken qızı Gülsum Aliyevağa protokol tizilgen. O, Facebookta paylaşqanları içün Rusiye CK (milletlerara zıddiyet çıqaruv) 282-nci maddesine köre qabaatlanğan edi.
2019 senesi yanvar ayında Aluştadaki Tahqiqat bölügi Gülsum Aliyevağa qarşı cinaiy davanı qapattı.
2019 senesi iyünniñ 12-nde Gülsum Aliyeva Facebookta paylaşqanları içün «nefret ya da duşmanlıq doğurğanında» (Rusiye MCK 20.3.1 maddesi) qabaatlanıp, memuriy sıñırda Rusiye quvetçileri tarafından tutuldı. Bir qaç künden soñ Aluştanıñ Rusiye prokuraturası Gülsum Aliyevanıñ memuriy davasını toqtatıp, mesüliyetke çeküv müddeti bitti, dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
