İşğal etilgen Qırımda Rusiye FSB-sınıñ hadimleri 1995 senesi doğğan eki erkekni diversiyalarda şübheli sayıp tuttı. Bu aqta Rusiye FSB-sınıñ cemaat alâqaları merkezi bildire.
"Ukrayina mahsus hızmetleriniñ emirlerine köre, 2024 ve 2025 seneleri bir sıra diversion-terroristik areketlerniñ yapılmasına alâqası olğan eki Rusiye vatandaşı tutuldı", — dep aytıla haberde.
FSB malümatına köre, 2024 senesi tutulğanlar Telegram vastasınen Ukrayin mahsus hızmetleriniñ vekili ile bağ qurğanlar.
Sözde, kurator vastasınen olar Qırımda Rusiye Mudafaa nazirliginiñ arbiy obyektleriniñ bulunması, tehnika ve infrastruktura kolonnalarınıñ avuştırılması, em de arbiy silâlı quvetlerniñ darbe neticeleri aqqında malümat bergenler.
Bundan da ğayrı, yaqalanğanlar demir yolunıñ reley şkaflarını ve Qırımnıñ Saq ve Aqmescit rayonlarında bağa alâqası stantsiyalarınıñ cihazlarını yaqqanlar.
Qayd etilgenine köre, yaqalanğanlarğa nisbeten Rusiye Federatsiyasınıñ Ceza kodeksiniñ 205 maddesine ve 205.3 maddesine istinsden cinaiy davalar açılğan.
Ukrayina akimiyeti vaziyetni izaatlamadı. Qırım.Aqiqat bu malümatnı cenk şaraitlerinde mustaqil olaraq teşkerip olamay.
