Rusiye Federal telükesizlik hızmetiniñ hadimleri Aqmescit rayonınıñ Çoyunçı (Urojaynoye) köyünde tintüv keçirgende vatandaş jurnalisti, qırımtatar faali Rolan Osmanovnı urbı. Bu aqta ömür arqadaşı Zemine «Qırım birdemligine» tarif etti.
«Bugün saba FSB hadimleri keldi, özüni tanıtıp, tintüv içün kelgenlerini aytqanlar. Kimsege telefon etip yetiştirmedik, sürip kirgenler, tez-tez cep telefonlarını alğanlar, aqayımnı yerge atqanlar, qollarını bağlağanlar», – dep bildirdi o.
Qadınnıñ aytqanına köre, Rolan Osmanov uquq qoruyıcılardan vesiqa bermelerini ve tintüv sebeplerini añlatmalarını rica etti, lâkin tek bir kişi şeadetnamesini kösterdi.
«Balanıñ traheostoması bar, oña kettim. Aqayımnı eki saniye qaldırdım, olar ise (FSB hadimleri – QA) onı endi urğanlar. Kene yerde yata. Kiri sorayım, ne yapasıñız dep, Rolan urğanlar dedi. Olar farqlı bir şey aytalar, amma mañlayı qırmızı. Vesiqa istegeni içün», – dep qayd etti Zemine.
O, bundan soñ Rusiye uquq qoruyıcıları agressiv bir şekilde tintüv keçirdi. Osmanovnıñ anası yaramadı – qadınğa acele yardım çağırıldı.
2019 senesi Osmanovnıñ evinde «operativ-qıdıruv tedbirleri» keçirildi. Uquq qoruyıcılar narkotik qıdırdı, amma bir şey tapmağanlar.
2022 senesi iyülniñ 13-nde «Nariman Celâl davasınıñ» esnası keçirilgen Rusiye Qırım Yuqarı mahkemesiniñ binası ögünde 39 yaşında Rolan Osmanovğa vatandaş urbasında, maskalı insanlar kelip tuttı. Daa soñra alınğan malümatqa köre, onı advokatlarnı tutuv ile alâqası olğan «E» merkeziniñ yolbaşçısı Ruslan Şambazov tuttı. Onıñ qararında Osmanov Facebook saifesinde «Rusiye Federatsiyasınıñ silâlı quvetlerini itibardan tüşürgen» paylaşuvlar yaptı, dep aytıla. «E» bölügine barmaq talabını red etti, er şeyni cep telefonına çıqardı, «itti» ve «tirendi». Onıñ areketleri Rusiye Federatsiyası Memuriy uquq bozuvları kodeksiniñ 19.3 maddesiniñ 1-nci qısmına istinaden memuriy protokol temeli oldı.
Sentâbr ayında Rusiye kontrolindeki Aqmescitniñ Kiyev rayon mahkemesi jurnalistke «Rusiye ordusını itibardan tüşürgeni içün» 40 biñ ruble para cezasını berdi.
Rolan Osmanov – qırımlı faal, vatandaş jurnalisti ve strimer. O, «restavratsiya» manaçığınen Han sarayınıñ yoq etilüvine qarşı narazılıq bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
