Rusiye uquq qoruyıcıları jurnalist, qırımtatar faali Rolan Osmanovnıñ evinde tintüv keçirdi, dep haber ete «Qırım birdemligi» cemaat birleşmesi.
«Aqmescit rayonınıñ Çoyunçı (Urojaynoye) köyünde faal ve vatandaş jurnalisti Rolan Osmanovnıñ evinde tintüv keçirile... Osmanov Aqmescitteki FSB İdaresine alıp ketirildi», – dep aytıla haberde.
2019 senesi Osmanovnıñ evinde «operativ-qıdıruv tedbirleri» keçirildi. Uquq qoruyıcılar narkotik qıdırdı, amma bir şey tapmağanlar.
2022 senesi iyülniñ 13-nde «Nariman Celâl davasınıñ» esnası keçirilgen Rusiye Qırım Yuqarı mahkemesiniñ binası ögünde 39 yaşında Rolan Osmanovğa vatandaş urbasında, maskalı insanlar kelip tuttı. Daa soñra alınğan malümatqa köre, onı advokatlarnı tutuv ile alâqası olğan «E» merkeziniñ yolbaşçısı Ruslan Şambazov tuttı. Onıñ qararında Osmanov Facebook saifesinde «Rusiye Federatsiyasınıñ silâlı quvetlerini itibardan tüşürgen» paylaşuvlar yaptı, dep aytıla. «E» bölügine barmaq talabını red etti, er şeyni cep telefonına çıqardı, «itti» ve «tirendi». Onıñ areketleri Rusiye Federatsiyası Memuriy uquq bozuvları kodeksiniñ 19.3 maddesiniñ 1-nci qısmına istinaden memuriy protokol temeli oldı.
Sentâbr ayında Rusiye kontrolindeki Aqmescitniñ Kiyev rayon mahkemesi jurnalistke «Rusiye ordusını itibardan tüşürgeni içün» 40 biñ ruble para cezasını berdi.
Rolan Osmanov – qırımlı faal, vatandaş jurnalisti ve strimer. O, «restavratsiya» manaçığınen Han sarayınıñ yoq etilüvine qarşı narazılıq bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
