«Ev» («Dom») yañı ukrain telekanalınıñ signalı aman-aman bütün işğal etilgen Qırımğa tarqalacaq. Bu aqta Yuqarı Radanıñ gumanitar ve informatsion siyaseti meseleleri komitetiniñ reis muavini Nikita Poturayev işğal etilgen topraqları içün yañı telekanalnıñ taqdim merasiminde ayttı.
«İşğal etilgen Donbas rayonlarında er yerni qaplap alacaqmız – anda çöl. Qırımda problemler bar. İlk esaplarğa köre, signal dağlarğa tirecek, er vaqıt öyle edi, relyefnen bir şey yapıp olamaymız. Çöl Qırımı – ebet, yalınıñ bir qısmı – ğarbiy ve şarqiy. Amma cenübiy yalığa keçemeycekmiz, ne yazıq ki», – dedi deputat.
Kyivde martnıñ 2-nde vaqtınca işğal etilgen Ukraina topraqlarına yayın yapacaq «Ev» («Dom») telekanalını taqdim ettiler. Ukraina prezidenti ofisiniñ reber muavini Kirill Timoşenko, kanalda diger ukrain telekanallarınıñ yayınları ve kanal azırlağan yayınlar kösterilecek, dep tarif etti.
2019 senesi yazda Ukraina prezidentiniñ ofisi işğal etilgen Donbasta ve Qırımda ukrainalılarnıñ ve Rusiyede rusiyelilerniñ «aqlı» içün küreşecek dünya rus tilli kanalnı quruv ğayesini seslendirgen edi.
Yanvarniñ 13-nde UATV halqara yayın ukrain telekanalınıñ ingliz ve qırımtatar tilli muarririyetleri işini toqtattı.
Ukraina memurları 2020 senesi fevral ayında UATV esasında Ukraina akimiyeti kontrol etmegen topraqlar içün rus tilli telekanal açılacaq, dep ilân etken edi.
