Rusiye akimiyeti tarafından kontrol etilgen Ermeni Bazar şeer mahkemesi qırımtatarlarnıñ milliy lideri Mustafa Cemilevge qarşı silânı apraş saqlav (Rusiye Ceza kodeksiniñ 224 maddesiniñ 1-inci qısmı) cinaiy davasını kene toqtatmadı. İmaye, cinaiy mesüliyetke çeküv müddeti bitkeni içün mezkür muracaatta bulunğan edi.
Bu aqta Mustafa Cemilevniñ advokatı Nikolay Polozov Qırım.Aqiqat mühbirine ayttı.
«Mahkeme Mustafa Cemilev bu muracaatqa ya razı olmaq, ya da itiraz bildirmek kerek edi dep, bu muracaatnı qanaatlendirmedi», – dep tarif etti Polozov.
Advokatnıñ aytqanına köre, imayeniñ mahkeme salonında olmağan Cemilev nasıl etip itiraz bildirecek degen sualge mahkeme cevap bermedi.
«Hatırlatayım, FSB Mustafa Cemilevniñ (işğal etilgen Qırımğa – QA) kirişini yasaqladı. Meraqlı şey – Cemilev itiraz bildirip olamay, çünki mahkeme oturışuvında yoq, ve mahkeme cinaiy davanı qapatmay», – dedi Nikolay Polozov.
Hatırlatamız, Rusiye kontrolindeki Ermeni Bazar şeer mahkemesi «silâ parçalarını qanunsız saqlağanında» qabaatlanğan qırımtatarlarnıñ milliy lideri Mustafa Cemilevge qarşı cinaiy davanı toqtatmağa razı olmadı.
Aprelniñ 26-nda Rusiye akimiyeti tarafından kontrol etilgen Ermeni Bazar şeer mahkemesi qırımtatarlarnıñ milliy lideri Mustafa Cemilev davası boyunca imayeniñ altı muracaatından beşini red etti.
Aprelniñ 15-nde Ermeni Bazar mahkemesiniñ oturışuvında qabaatlav tarafı Cemilevniñ 2014 senesi mayısta Qırım ve Herson vilâyetiniñ memuriy sıñırını qanunsız keçüv davasınen bağlı video delillerini kösterip bitirdi.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Hatırlatamız, qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi. Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
