Rusiye kontrolindeki Ermeni Bazar şeer mahkemesiniñ oturışuvında aprelniñ 15-nde qabaatlav tarafı işğal etilgen Qırımda mahkeme etilgen qırımtatar halqınıñ milliy lideri Mustafa Cemilevniñ davası boyunca bütün video delillerini kösterdi.
Bu aqta advokat Nikolay Polozov Qırım.Aqiqat mühbirine tarif etti.
«Bugün biz qabaatlav tarafı bergen video ve foto delillerini tedqiq etip bitirdik. Bugünki mahkeme oturışuvında videolarda 2014 senesi mayısnıñ 3-nde (Qırım ve Herson vilâyetiniñ memuriy sıñırı qanunsız keçilgen kün olaraq adlandırıla – QA) adise-vaqialar olğan yerde anda keçiş noqtası ya da devlet sıñırı işaretine oşağan bir şey olmağanını kördik», – dep tarif etti Polozov.
Bundan ğayrı, oturışuvda advokat Mustafa Cemilevniñ kütleviy haber vastalarına bergen intervyüsında «Rusiyege kiriş yasağı aqqında bir vesiqa berilmege» aqqında aytqanına diqqatnı celp etti.
Mahkemede baqılğan videolardan belli olğanına köre, mayısnıñ 3-nde adise-vaqialar olğan yerde o vaqıt Qırımnıñ iç işler naziriniñ vazifelerini eda etken Sergey Abisov bar edi.
Bu dava boyunca nevbetteki oturışuv aprelniñ 16-nda saba olacaq.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Hatırlatamız, qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi. Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
