Ukraina Tış işler naziri Dmıtro Kuleba Türkiye ve Rusiye prezidentleri Recep Tayyip Erdoğan ve Vladimir Putinniñ körüşüvini ve qapalı muzakerelerini tefsir etti. Kuleba, Ukraina prezidenti Volodımır Zelenskıynıñ New Yorkta Erdoğannen kerçekleştirgen körüşüvi ve Rusiye apsinde tutulğan ukrainalılar cedvelini bergeni aqqında hatırlattı.
«Prezident Zelenskıy bu cedvelni berip, prezident Erdoğandan Rusiye prezidenti Vladimir Putinnen bu insanlar aqqında laf etmesini rica etti, çünki vatandaşlarımıznı Rusiye apishanelerinden azat ettirmek kerek. Er bir memleketniñ açıq qapular, qapalı qapular arqasında muzakere keçirmek aqqı bardır. Bu olarnıñ aqqı, buña iç bir şekilde kirişmeymiz. Amma memleketlerimiz (Ukraina ve Türkiye – QA) arasında bayağı yüksek seviyeli işanç bar. Eminim, kelecek afta Türkiye Tış işler naziriniñ Lviv ziyareti vaqtında Erdoğannıñ Rusiye ziyareti nasıl keçkenini de laf etecekmiz», – dep ayttı Kuleba sentâbrniñ 30-nda online brifingde.
Erdoğan sentâbrniñ 29-nda Soçige keldi. Türkiye prezidentiniñ resmiy saytında haber etilgenine köre, eki memleketniñ liderleri muzakerelerinde eki taraflı munasebetler, «Suriye, Libiya ve Afğanistannen beraber regional adiseler ve halqara meselelerni» muzakere etmek kerek ediler. Erdoğan, Putinden Rusiye tarafından Suriyedeki ateşkes añlaşmasına riayet etilmesini talap etecek, dep beklenile edi.
Rusiye prezidentiniñ matbuat kâtibi Dmitriy Peskov Qırım mevzusı körüşüvde köterilmeycek, dep aytqan edi.
Keçken afta Birleşken Milletlerde Türkiye prezidenti Qırım ilhaqını tanımağanını daa bir kere tekrarladı. Kreml, Erdoğannıñ Qırımnen bağlı aytqanları Rusiye ziyaretine tesir etmeycek, dep bildirdi.
Türkiye Tış işler nazirligi derc etken beyanatta Ankara Qırımda keçirilgen Rusiye Devlet dumasınıñ saylav neticelerini tanımaycaq, dep aytıldı. Rusiye Tış işler nazirligi ve Kreml bu beyanatnı tenqit etti.
Kreml, Qırım meselesinde fikirler farqlı olsa da, Rusiyede Türkiyeni ortaq dep saymağa devam eteler, dep qayd etti.
