Qırımda fevral ayında 90 yaşını tolduracaq ressam Sadıq Acı Selimov vefat etti. O, qırımtatar halqınıñ sürgünligi aqqında ikâye etken «1944» filminiñ qaramanı edi. Levha Kyivde 2019 senesi mayısnıñ 18-nde kösterildi. Bu aqta Ukraina Tış işler naziriniñ birinci muavini Emine Ceppar Facebook saifesinde yazdı.
«Resim yapmağa imkânı olmayıp, balalıqtan yapqan resimler vastasınen film kösterildi. Birinci resimini divarda yaptı. 13 yaşında olğanda 1944 senesiniñ sürgünligini kördi, körgen acı ve ğayıplarını, açlıq ve sürgünlik cinayetlerini Sadıh resimlerde tasvir etti. Onıñ aytqanına köre, Sovetler Birligi vaqtında oña – mektepte resim dersini bergen adiy ocağa – mahsus hızmetler kelgen edi. Qırım ve sürgünlik resimlerini badana etip (soñra qolay yuvmaq içün), kümeste saqlamağa mecbur edi», – dep bildirdi Ceppar.
Onıñ aytqanına köre, Selimovnıñ eñ büyük arzusı resim albomını yapmaq edi.
«Bu arzusını Yuriy Stets, Artem Bıdenko ve Viktor Litvinovnen beraber kerçekleştirmege yetiştirip olğanımızğa quvanam. Onıñ ayat ikâyesi ise «1944» filminde ebediy yaşaycaqtır», – dep qayd etti Emine Ceppar.
2019 senesi mayısnıñ 17-nde Kyivdeki «D12» galereyasında qırımtatar sürgünligi aqqında «1944» vesiqalı filminiñ premyerası olıp keçti. Onıñ rejissörları Yunus Paşa ve Qırım.Aqiqat müellifi Fatima Osman olğanlar.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
