Aqmescit civarındaki Molodejnoye qasabasında tahqiqat tedbirlerinden soñ tutulğan Qırımtatar Milliy Meclisiniñ sabıq azası Eldar Mensitov FSB binasından evine qayttı.
Bu aqta qırımlı aq qorçalayıcı Lutfiye Zudiyeva advokat Refat Yunusnıñ malümatına esaslanıp bildirdi.
«Advokat Refat Yunus Molodejnoye meclisiniñ sabıq reisi ve Aqmescitteki Regional meclisiniñ sabıq azası Eldar Mensitov FSB binasından yiberildi. Şimdi telükesizlikte, evinde buluna», – dep yazdı Zudiyeva Facebook saifesinde.
Rusiye quvetçileri Aqmescit civarındaki Molodejnoye qasabasında tahqiqat tedbirlerinden soñ belli olmağan yerge alıp ketken Eldar Mensitovnıñ bulunğan yeri belli degil edi.
Bu malümatnı advokat Nikolay Polozov da Qırım.Aqiqatqa tasdıqladı. Onıñ bildirgenine köre, Eldar Menseitov Qırımda ğıyabiy şekilde mahküm etilgen qırımtatar halqınıñ milliy lideri Mustafa Cemilevniñ davasında şaat ola.
«O, (Eldar Menseitov – QA) Ahtem Çiygoz (Qırımtatar Milliy Meclisiniñ reis muavini – QA) davasında şaat oldı, Mustafa Cemilev davasında imaye şaatı oldı. Qayda tutuldı ve şimdi qayda buluna bilmeyim», – dep ayttı Polozov.
Rusiye quvetçileri «Qırım birdemliginiñ» malümatına tefsir etmey. Qırım.Aqiqat tafsilâtlı malümat almağa tırışa.
Ukraina ombudsmanı Lüdmila Denisovanıñ malümatına köre, Rusiye quvetçileriniñ daa evel belli olmağan yerge alıp ketilgen Eldar Mensitovğa qarşı areketleri avgustnıñ 23-nde Aqmescit civarındaki gaz borusında olğan kibi aytılğan «diversiyanen» bağlı.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay. Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
