Link açıqlığı

Saatnıñ esas haberi

Tutulğan qırımlı Mensitovnıñ bulunğan yeri alâ daa belli degil – advokat


Advokat Refat Yunus

Qırımda Rusiye quvetçileri Aqmescit civarındaki Molodejnoye qasabasında tahqiqat tedbirlerinden soñ belli olmağan yerge alıp ketken Eldar Mensitovnıñ bulunğan yeri belli degil. Bu aqta «Qırım birdemligi» advokat Refat Yunusnıñ malümatına esaslanıp bildire.

«Aqmescit rayonınıñ Molodejnoye qasabasında tintüvden soñ tutulğan Qırımtatar Milliy Meclisiniñ sabıq azası, 51 yaşında 3-ünci derece saqatı Eldar Mensitovnen bağ yoq, ondan bir haber de yoq. Advokat Refat Yunus onıñ bulunğan yerini bilmek içün Qırımdaki FSB idaresine, Qırım Cumhuriyetiniñ ve Rusiyeniñ prokuraturasına muracaat etti», – dep aytıla haberde.

Advokatnıñ malümatına köre, er adamnıñ evinde sentâbrniñ 7-nde saba saat 9-larda tintüv başladı ve tek yarı gecege yaqın yekünlendi. Evde tek apayı bar edi, bütün bağ vastaları alındı, tahqiqat tedbirleri yekünlengen soñ Eldar Mensitovnı belli olmağan yerge alıp kettiler. Quvetçiler tintüv qararını kösterdi, amma evde başqa kimse olmağanında emin olmaq içün qadınnı ayrı odağa qapatqanlar. Mensitovğa bir qabaatlav aytıldımı ve angi maddege istinaden belli degil.

Bu malümatnı advokat Nikolay Polozov da Qırım.Aqiqatqa tasdıqladı. Onıñ bildirgenine köre, Eldar Menseitov Qırımda ğıyabiy şekilde mahküm etilgen qırımtatar halqınıñ milliy lideri Mustafa Cemilevniñ davasında şaat ola.

«O, (Eldar Menseitov – QA) Ahtem Çiygoz (Qırımtatar Milliy Meclisiniñ reis muavini – QA) davasında şaat oldı, Mustafa Cemilev davasında imaye şaatı oldı. Qayda tutuldı ve şimdi qayda buluna bilmeyim», – dep ayttı Polozov.

Rusiye quvetçileri «Qırım birdemliginiñ» malümatına tefsir etmey. Qırım.Aqiqat tafsilâtlı malümat almağa tırışa.

Ukraina ombudsmanı Lüdmila Denisovanıñ malümatına köre, Rusiye quvetçileriniñ daa evel belli olmağan yerge alıp ketilgen Eldar Mensitovğa qarşı areketleri avgustnıñ 23-nde Aqmescit civarındaki gaz borusında olğan kibi aytılğan «diversiyanen» bağlı.

Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.

Ukraina Tış işler naziriniñ birinci muavini Emine Ceppar Rusiye akimiyeti raatlıq künleri tutulğan beş insannı Aqmescit civarındaki Anğara (Perevalnoye) köyü yaqınlarında gaz borusında olğan diversiyanen bağlay, dep bildirdi. Amma gaz borusında bir şey oldımı belli degil, «başqa menbalar gaz hattı zarar körgenini tasdıqlap olamadı».

Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay. Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.

FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.

Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG