Bugün, ilk yaz ayınıñ 26-nda, Qırımtatar bayrağı künü qayd etile. 2010 senesi qırımtatar gençleriniñ teşebbüsinen Qırım yarımadasında peyda olğan anane şimdi Ukrayinanıñ qıtaiy qısmında da bar. Bu künni qırımtatar toplulığı yaşağan dünyanıñ bir çoq memleketinde de qayd eteler. Bu kün Kıyivde nasıl keçti Qırım.Aqiqat/Azatlıq Radiosınıñ reportajinda.
Kök tüsündeki keten üstünde altın tamğalı qırımtatar bayrağı 1917 senesi qırımtatar halqınıñ Birinci Qurultayı tarafından tasdıqlandı.
Altın tamğalı kök bayraq. Qırımtatar bayrağı 1917 senesinden künümizge qadar (fotoresimler)
Qırımnıñ özünde ise, 2014 senesi Rusiye tarafından işğal etilgen soñ qırımtatar bayrağı qırımtatarlarnıñ Rusiye istilâsına qarşı tirenüviniñ timsali ve kimlikniñ timsali oldı.
Kıyivde ilk yaz ayınıñ 26-nda saba qırımtatar milliy bayrağı Ukrayina TİN binası ögünde tantanalı şekilde köterildi.
Tedbirde Ukrayina prezidentiniñ Qırım Muhtar Cumhuriyetindeki daimiy temsilcisi Ölğa Kurışko, Ukrayina tış işler naziriniñ muavini Maryana Betsa, Yevğen Perebiynis ve Anton Demehin, Ukrayinanıñ Yaqın Şarq ve Afrika meseleleri mahsus temsilcisi Maksim Subh, Ukrayina Tış işler nazirliginiñ devlet kâtibi Aleksandr Karaseviç ve Qırımtatar Milliy Meclisiniñ reisi Refat Çubarov iştirak ettiler.
"Bugün qırımtatar bayrağı — Qırımnıñ Ukrayinadan ayırılmazlığınıñ işareti ola. Şübesiz ki, saflarında Ukrayinanı qırımtatarlar qorçalağan Ukrayina havfsızlıq ve mudafaa quvetleriniñ cesür arbiyleri sayesinde qırımtatar bayrağı Ukrayina devlet bayrağı yanında bütün Qırım üzerinde suveren mustaqil demokratik Ukrayina devleti terkibinde qırımtatar muhtar cumhuriyetiniñ timsali olaraq dalğalanacaq", — dep bildirdi Qırımtatar Milliy Meclisiniñ reisi Refat Çubarov.
Qırımtatar Bayrağı künü munasebetinen Kıyivde Kıyiv şeer devlet memuriyeti, Taras Şevçenko adına Kıyiv milliy universiteti ve Vladimir Vernadskiy adına Tavriya milliy universitetinde tantanalı şekilde altın tamğalı kök bayraqlar köterildi.
Mıhaylivska meydanında da bir büyük qırımtatar bayrağı açıldı, anda qırımtatar halqınıñ "Ant etkenmen" milliy gimni de yañğıradı.
Tedbirde Kıyivdeki qırımtatar cemiyetiniñ vekilleri, Qırımtatar Milliy Meclisiniñ azaları, arbiyler iştirak etti. Meclis reisi Refat Çubarov bildirdi ki, qırımtatar bayrağı ukrayin cemiyetinde, şimdi ise bütün dünyada qırımtatarlarnıñ Qırımdan ayırılmazlığını, Qırımnıñ Ukrayinadan ayırılmazlığını timsal ete.
Milliy bayraqnı açuv merasiminde qırımtatar halqınıñ lideri Mustafa Cemilev, Ukrayina merkeziy akimiyet organları, diplomatik korpus ve cemaat teşkilâtlarınıñ vekilleri iştirak etti.
"Qırımtatar bayrağı qırımtatarlarnen beraber bütün tarih boyunca keçti: işğal, açlıq, sürgünlik ve qaytuv. Ve şimdi biz onı azat etilgen Qırımda Ukrayina devlet bayrağı ile beraber körmek isteymiz", — dep bildirdi tedbir vaqtında Ukrayina prezidentiniñ Qırım Muhtar Cumhuriyetindeki daimiy temsilcisi Ölğa Kurışko.
Ukrayina Yuqarı Radasınıñ reisi Ruslan Stefançuk bayram munasebetinen qayd etti ki, qırımtatar bayrağı halqnıñ azatlıq ve öz toprağında olmaq aqqı oğrunda küreşiniñ timsali ola. Ukryina mudafaa naziri Rustem Umerov qırımtatar bayrağını boysunmağan halqnıñ, azatlıq oğrunda küreşniñ, tarihiy qıymet ve Rusiye işğaline qarşılıq timsali dep adlandırdı.
Rustem Umerov şunı da qoştı: "Bu künde repressiyalarğa oğrağan er kesni añamız. Bizler küreşmege devam etkenlerge minnetdarmız. Ve bir kere daa hatırlatamız: Qırım ukrayin edi, ukrayindir ve ukrayin olacaq".
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.