Avropa Birliginiñ OSCE daimiy temsilciligi Aqmescitte advokat Edem Semedlâyevniñ apiske alınmasını qayd etip, işğal etilgen Qırımda aq qorçalayıcı ve advokatlarnıñ muntazam sürette taqip etilüvini «telükeli meyil» dep adlandırdı.
«Avropa Birligi Qırım yarımadasında advokatlarğa muntazam sürette yapılğan ücüm ve taqiplerniñ telükeli meyline yazıqsına. Qırımlılarnıñ millet mensüpligine köre taqip etilüvini takbih etemiz. AB, advokat Edem Semedlâyevniñ tutuluvına yazıqsınıp, Rusiyeni halqara uquqnı ürmet etmesine ve yarımadada insan aqlarınıñ bozuluvını toqtatmasına çağıra», – dep aytıla noyabrniñ 18-nde derc etilgen ABniñ OSCE beyanatında.
ABD OSCE missiyası Qırımda mustaqil advokatlarğa qarşı taqip siyasetini toqtatmasına çağırdı.
Rusiye kontrolindeki Qırım Yuqarı mahkemesi advokat Edem Semedlâyevniñ apiske alınmasına qarşı bergen istinafını red etti. İstinaf şikâyeti qapalı rejimde baqıldı.
Noyabrniñ 11-nde Rusiye kontrolindeki Aqmescitniñ Merkeziy rayon mahkemesi Edem Semedlâyevni Ekstremizm ile küreş merkeziniñ bölük başı Ruslan Şambazovnıñ ses qaydını toqtatmaq talabını yerine ketirmegeni içün 12 künge apiske aldı. Mahkeme oña Ekstremizm ile küreş merkezi hadiminiñ soyunmaq talabını yerine ketirmegeninen bağlı ekinci memuriy dava boyunca 4 biñ ruble para cezasını da berdi.
Qırım Muhtar Cumhuriyeti ve Aqyar prokuraturası qırımlı advokat Edem Semedlâyevni apiske alğan Aqmescitteki Rusiye mahkemesiniñ qararına uquq ceetinden qıymet kesmege vade ete.
Rusiye ve Qırım akimiyetleri yarımadada millet ve din mensüpligine köre bir de bir basqı yapılğanını inkâr ete.
