Rusiye nazaretinde olğan Qırımnıñ Yuqarı mahkemesi Edem Semedlâyevniñ tevqif etilmesine berilgen istinaf şikâyetini red etti. Bunı advokat Emil Kurbedinov haber etti.
Şunı da qayd etti ki, advokatlar bu mahkeme qararını eñ yuqarı instantsiyada temyiz etecek olalar.
Kurbedinovnıñ sözlerine köre, Semedlâyevni qarar ilân etilmyesine ketirgenler ve soñra kene muvaqqat tutuv izolâtorına alıp ketkenler.
Noyabrniñ 11-nde Rusiye kontrolindeki Aqmescitniñ Kiyev rayon mahkemesi advokat Edem Semedlâyevni 12 künge apiske aldı ve Ekstremizm ile küreş merkeziniñ hadimlerinden biriniñ ögünde soyunmaqtan red etkeni içün 4 biñ ruble para cezasını berdi.
Cumaertesi künü, oktâbrniñ 25-nde, Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
