Rusiye nezaretinde olğan Aqmescitniñ Merkeziy rayon mahkemesiniñ qırımtatar faali Edem Bekirovnıñ davası boyunca oturışında mudafaa tarafı gizli şaatnıñ kimligini bildirilmesini istep, muracaat etti. Bunı martnıñ 10-nda Qırım.Aqiqatqa advokat Aleksey Ladin bildirdi.
Onıñ malümatına köre, gizli şaat Bekirovnıñ tarafından yaqınlarınıñ ayatı ve sağlığı içün tehditler olğanını aytqan. Bu tehditniñ ne olğanını ve gizli şaatnıñ bu neticege kelmesi içün Bekirov angi arektelerni yapqanını o añlatmadı. Buña baqmadan, mahkeme muracaatnı red etti.
Ladinniñ sözlerine köre, bu şaat sorğuğa çekilgen zamanı «bazı uymamalar ortağa çıqtı».
«Şaat, Bekirovnıñ onen körüşkende qoltuqtayaqları bar edimi, yoqmı adamcasına añlatıp olamadı. Topallay edi, dedi. Çanta ise, şaatnıñ sözlerine köre, ya da köpçeklernen edi, ya da onı süreklep ketirdi. Hatırlatmaq isteyim ki, çanta 14 kilo edi. Anda 200 patron bar edi. Qalğan trotil şaşkaları edi. Bu çantanı süreklep ketirgeni pek meraqlı. Çünki istegen vaqıtta er şey patlay bile edi», – dep qayd etti Ladin.
Nevbetteki mahkeme oturışı martnıñ 19-nda olacaq.
Rusiye nezaretinde olğan Aqmescitniñ Merkeziy rayon mahkemesi qırımtatar faali Edem Bekirovnıñ davası boyunca Rusiye FSB-niñ dört hadimini sorğuğa çekti.
Al-azırda Ukraina qıtıasında yaşağan sabıq siyasiy mabüs Edem Bekirov, işğal etilgen Qırımda davası boyunca mahkeme diñlevlerniñ yañartılmasını qanunsız saya.
Ukraina Yuqarı Radasınıñ insan aqları vekâletlisi Lüdmila Denisova Qırımda eski siyasiy mabüs, qırımtatar faali Edem Bekirovğa qarşı mahkeme oturışuvlarınıñ yañıdan başlağanını takbih etti.
Bundan evel Qırım Yuqarı mahkemesi evelki instantsiya mahkemesiniñ qararını deñiştirmeyip, eski siyasiy mabüs, qırımtatar faali Edem Bekirovnı qıdıruvğa ilân etti.
2020 senesi mayısnıñ 14-nde Kreml kontrolindeki Aqmescitniñ Merkeziy rayon mahkemesi 2019 senesi sentâbr ayında Ukraina ve Rusiye arasında tutulğan şahıslarnı deñişüv neticesinde SİZOdan azat etilgen qırımtatar faali Edem Bekirovnıñ cinaiy davasını yañıdan baqıp başladı. Daa soñra aynı mahkeme faalni mahkemege «zornen ketirmege» qarar berdi. Mayısnıñ 22-nde prokurornıñ muracaatınen qadı Bekirovnı qıdıruvğa ilân etmege qarar aldı.
Edem Bekirovnıñ fikirince, Qırımda yañıdan başlatılğan mahkeme esnası ve qıdıruvğa ilân etilüvi qabaatlayıcı ükümnen yekünlenecek.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
