Al-azırda Ukraina qıtıasında yaşağan sabıq siyasiy mabüs Edem Bekirov, işğal etilgen Qırımda davası boyunca mahkeme diñlevlerniñ yañartılmasını qanunsız saya.
“Qırımtatarlarnı, ukrain tarafdarlarını qanunsız sürette tutmağa nasıl mümkün olğanını añlamayım. Er kün olarnı tüşünem. Tintüvler ise alâ daa devam eteler. Azat etilsgen soñ, men beş kere hastahanede yatıp çıqtım, ameliyat oldı, koronavirsqa oğradım. Şimdi ise davam boyunca mahkeme oturışı. Bir ayağımnen o bir dünyada olğanımnı añlap, meni azat ettiler. Şimdi ise, men tırmaşıp çıqmağa başlağanda, olar kene peyda oldılar”, – “Qırım birdemligi” Bekirovnıñ aytqanlarından alıntı ketire.
Bekirovnıñ advokatı Aleksey Ladinniñ bildirgenine köre, bu esnas sahteciliktir. Onın fikrince, böyle etip, akimiyet Edem Bekirovnı uzaqlaştırıp, Qırımğa yibermemege istey.
“Bir taraftan FSB talabınen onı azat eteler, diger taraftan Rusiye mahkeme sisteması mahküm etecek ola. İhtimal ki, onı belli bir müddetke mahküm etecekler ve Qırımğa kelgen kibi olsa, apis etecek olalar”, – dedi Ladin.
Ukraina Yuqarı Radasınıñ insan aqları vekâletlisi Lüdmila Denisova Qırımda eski siyasiy mabüs, qırımtatar faali Edem Bekirovğa qarşı mahkeme oturışuvlarınıñ yañıdan başlağanını takbih etti.
Bundan evel Qırım Yuqarı mahkemesi evelki instantsiya mahkemesiniñ qararını deñiştirmeyip, eski siyasiy mabüs, qırımtatar faali Edem Bekirovnı qıdıruvğa ilân etti.
2020 senesi mayısnıñ 14-nde Kreml kontrolindeki Aqmescitniñ Merkeziy rayon mahkemesi 2019 senesi sentâbr ayında Ukraina ve Rusiye arasında tutulğan şahıslarnı deñişüv neticesinde SİZOdan azat etilgen qırımtatar faali Edem Bekirovnıñ cinaiy davasını yañıdan baqıp başladı. Daa soñra aynı mahkeme faalni mahkemege «zornen ketirmege» qarar berdi. Mayısnıñ 22-nde prokurornıñ muracaatınen qadı Bekirovnı qıdıruvğa ilân etmege qarar aldı.
Edem Bekirovnıñ fikirince, Qırımda yañıdan başlatılğan mahkeme esnası ve qıdıruvğa ilân etilüvi qabaatlayıcı ükümnen yekünlenecek.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
