Link açıqlığı

Saatnıñ esas haberi

Rusiye arbiyleri sabıq siyasiy mabüs Edem Bekirovnıñ Herson vilâyetindeki evinde yaşay – Çubarov


Edem Bekirov, arşiv fotoresimi
Edem Bekirov, arşiv fotoresimi

Rusiye arbiyleri Kremlniñ sabıq siyasiy mabüsi Edem Bekirovnıñ işğal etilgen Herson vilâyetiniñ Novooleksiyıvka qasabasındaki evine yerleşti. Bu aqta Qırımtatar Milliy Meclisiniñ reisi Refat Çubarov Facebookta bildirdi.

«Geniçesk rayonınıñ Novooleksiyıvka qasabasında Rusiye varvarları saipleri tahliye olmağa mecbur olğan evlerni tapmaq ve Rusiye arbiy aydutlarını yerleştirmek içün tekrar reyd yaptı. Birinciden Ukrayınağa sadıq qalğanınen meşur insanlarnıñ evlerine «yerleştireler». Rusiye işğalcileri Edem ve Gulnara Bekirovlarnıñ ev qapusını qırıp yerleşken: Edem – Kremlniñ sabıq reinesi, Gülnara – Qırımtatar Milliy Meclisiniñ azası. Bekirovlar işğal altındaki Novooleksiyıvkadan tahliye etilgen edi», – dep bildirdi Çubarov.

Onıñ aytqanına köre, soñki künleri Rusiyeniñ işğali altında olğan Herson vilâyetiniñ rayonlarından kelgen malümat «kütleviy işkence, soğuncılıq ve Ukrayına vatandaşlarınıñ taqip etilüvi» aqqında ayta.

«Rusiye varvaları eñ çoq yapqan canavarlıq vatandaşlarnı apiske alıp, «mağazğa» qapatuv ola, anda olardan Rusiye vatandaşlığını ve Rusiye pasportını almağa istegenlerini aytmağa talap eteler. Red etkenler işkencege oğratıla ve evi, maşinası ve ilâhre mülkini Rusiye işğalcilerine yazıp bermege talap etile, soñra olarnı işğal etilgen topraqlardan çıqaralar», – dedi Çubarov.

Rusiye arbiyleri bu malümatnı açıq sürette izaatlamay.

Rusiyeniñ Ukrayınağa qarşı büyük istilâsı başlağan soñ Rusiye uquq qoruyıcıları Edem Bekirovnıñ evini tintken edi.

Rusiye kontrolindeki Aqmescit mahkemesi 2021 senesi iyün ayında Edem Bekirovnı 7 yıl apis cezasına ve 150 biñ para cezasına üküm etti. Bekirov, bu üküm «halqnı qorquzmaq» içün çıqarıldı, dep qayd etti.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG