Ukraina ombudsmanı Lüdmila Denisovanıñ malümatına köre, Rusiye quvetçileriniñ Eldar Mensitovnı belli olmağan yerge alıp ketmesi avgustnıñ 23-nde Aqmescit civarındaki gaz borusında «diversiya» davasınen bağlı.
«Tahqiqat areketleri» ve Mensitovnıñ tutuluvı, ilk malümatqa köre, avgustnıñ 23-nde Anğara köyünde gaz borusınıñ bozuluvınen bağlı», – dep yazdı Denisova Facebook saifesinde.
Denisova halqara toplulıqnı Rusiye areketlerini takbih etmesine ve ukrain ve qırımtatar siyasiy mabüsleriniñ azat etilüvi içün Rusiye akimiyetine qarşı sanktsion basqını quvetleştirmesine çağırdı.
«Rusiyeden Qırım yarımadasınıñ tamır halqını taqip etüvni acele toqtatmasını ve qanunsız tutulğan Ukraina vatandaşlarını azat etmesini talap etem. Halqara toplulıqnı işğalci devletniñ qanunsız areketlerini qararlı bir şekilde takbih etmesine ve vaqtınca işğal etilgen Qırımda insan aqlarınıñ sert bozuluvını toqtatmaq içün Rusiyege qarşı siyasiy-sanktsion basqını quvetleştirmesine çağıram», – dep yazdı Denisova.
Sentâbrniñ 8-nde belli olğanına köre, Aqmescit civarındaki Molodejnoye qasabasında Rusiye quvetçileri tahqiqat tedbirlerinden soñ Eldar Mensitovnı belli olmağan yerge alıp ketti.
Bu malümatnı advokat Nikolay Polozov da Qırım.Aqiqatqa tasdıqladı. Onıñ bildirgenine köre, Eldar Menseitov Qırımda ğıyabiy şekilde mahküm etilgen qırımtatar halqınıñ milliy lideri Mustafa Cemilevniñ davasında şaat ola.
Ukraina Tış işler naziriniñ birinci muavini Emine Ceppar Qırımda Eldar Mensitovnıñ tutuluvını Rusiye tarafından «repressiyalarnıñ devamı» dep adlandırdı.
Rusiye Federal telükesizlik hızmeti sentâbrniñ 7-nde Ukraina Mudafaa nazirliginiñ Baş istihbarat idaresiniñ ve Qırımtatar Milliy Meclisiniñ Aqmescit civarındaki Anğara köyünde gaz borusında «diversiya» ile alâqaları bar, dep bildirdi.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olarnıñ arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
2021 senesi iyünniñ 18-nde Rusiye kontrolindeki Ermeni Bazar şeer mahkemesinde Menseitov «Mustafa Cemilev davasında» imaye şaatı olaraq şaatlıq etti.
