Ukraina Yuqarı Radasınıñ insan aqları vekâletlisi Lüdmili Denisova Rusiye nezaretinde olğan Aqmescitniñ Merkeziy rayon mahkemesini oktâbrniñ 11-nde mahkeme binası ögünde Rusiye polisi tarafından yaqalanğan qırımtatar faalerine para cezalarını bermesi içün takbih etti. Bunıñ aqqında oktâbrniñ 12-nde ombudsmannıñ matbuat hızmeti bildirdi.
Qayd etilgeni kibi, Denisova emindir ki, tecavuzcı cöremeler yardımı ile işğal etilgen Qırımda qırımtatarlarğa vatandaş noqta-i nazarıni mudafaa etkenlerine köre tazyıq etmege devam ete.
"İşğalci memleket öz areketlerinen insan aqlarınıñ ve esas serbestliklerniñ mudafaası aqqında Şartnameniñ 10-uncı maddesini boza. Bu maddege köre, er kes fikrini ifade etme azatlığı aqqına maliktir", – dep qayd etti Denisova.
İnsan aqları vekâletlisi, dünya toplulığını Qırımnıñ tamır halqına qarşı etilgen basqılarnı toqtatmaq içün Rusiyege qarşı sanktsiyalarnı ve siyasiy tazyıqnı devam etmege çağırdı.
Rusiye nezaretinde olğan Aqmescitniñ Merkeziy rayon mahkemesi oktâbrniñ 11-nde mahkeme binası ögünde Rusiye polisi tarafından yaqalanğan daa beş qırımtatar faalini para cezasına mahküm etti. Cöremeniñ umumiy miqdarı 55 biñ ruble teşkil etti. Bundan evel, qırımtatar faalleri Dilâver Memetov ve Reşat Paralamovğa 20 ve 10 biñ ruble para cezası berildi.
Aqmescitteki Rusiye İç işler nazirligi idaresiniñ «Merkeziy» üçünci polis bölügi ögünde eñ az beş kişi tutuldı, olarğa qarşı Rusiye Memuriy uquq bozuvları kodeksiniñ 20.2 maddesiniñ 1-inci qısmına istinaden memuriy protokollar tizildi.
Daa evel berilgen malümatqa köre, Aqmescitte Qurmandaki «Hizb ut-Tahrir davasınıñ» ükmüne qarşı istinaf baqılacaq olğan mahkeme binası ögünde Rusiye quvetçileri 15 qırımtatarını tuttı.
Bundan evel mahkeme ögünde bir qaç insannıñ tutulğanı belli oldı.
Rusiye kontrolindeki Qırım uquq qoruyıcıları bugün Aqmescitte olğan kütleviy tutuvlar aqqında bildirmey ve tefsir etmey.
