Aqmescitteki Rusiye İç işler nazirligi idaresiniñ «Merkeziy» üçünci polis bölügi ögünde eñ az beş kişi tutuldı, olarğa qarşı Rusiye Memuriy uquq bozuvları kodeksiniñ 20.2 maddesiniñ 1-inci qısmına istinaden memuriy protokollar tizildi. Bu aqta «Qırım birdemligi» cemaat birleşmesi Qırım.Aqiqatqa haber etti.
Qayd etmeli ki, Rusiyeniñ Memuriy uquq bozuvları kodeksiniñ 20.2.2 maddesiniñ 1-inci qısmı cemaat nizamınıñ bozuluvına ketirgen vatandaşlarnıñ cemaat yerlerinde kütleviy bulunması ve (ya da) areket etmesini teşkil etüv sayıla.
Faallerniñ malümatına köre, tutulğan eki kişi – saba tutulğan bağçasaraylı Sadır Urinbayevniñ kiyevi ve oğlu.
Birleşme tutulğanlarnıñ cedvelini aydınlata:
- Umer Memetov
- Bilâl İbragimov
- Seyt-Nafe Muratov
- Hamza Urinbayev
- Memet Lümanov
«Qırım birdemligi» bildirgenine köre, uquq qoruyıcılar «kütleviy tedbirlerniñ keçirilmesi mümkün degil» dep tenbilegen soñ daa bir kişi polis bölüginden maşinanen ketmege tırıştı, lâkin ondan da bölükke keçmesini rica ettiler.
Advokat Emil Kurbedinovnıñ faallerge haber etkenine köre, tutulğan insanlardan biriniñ parmaq izlerini almağa tırıştılar ve polis bölügi ögünde tutulğanlarnıñ fotosüretleri yapıldı.
Daa evel berilgen malümatqa köre, Aqmescitte Qurmandaki «Hizb ut-Tahrir davasınıñ» ükmüne qarşı istinaf baqılacaq olğan mahkeme binası ögünde Rusiye quvetçileri 15 qırımtatarını tuttı.
Bundan evel mahkeme ögünde bir qaç insannıñ tutulğanı belli oldı.
Rusiye kontrolindeki Qırım uquq qoruyıcıları bugün Aqmescitte olğan kütleviy tutuvlar aqqında bildirmey ve tefsir etmey.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
