Link açıqlığı

Saatnıñ esas haberi

Denisova, «Hizb ut-Tahrir davası»nıñ mabüsleri hastalanğanı içün Moskalkovağa muracaat etti


Lüdmila Denisova
Lüdmila Denisova

Ukraina Yuqarı Radasınıñ insan aqları vekâletlisi Lüdmila Denisova Rusiye zenaatdaşı Tatyana Moskalkovağa muracaat etip, Aqmescit «Hizb ut-Tahrir» davasınıñ hastalanğan mabüslerine tibbiy yardım kösterilmesini istedi. Bunıñ aqqında Lüdmila Denmsova içtimaiy ağlarındaki saifesinde yazdı.

«Ekinci Aqmescit «Hizb ut-Tahrir davası» boyunca (Cemil Gafarov, Erfan Osmanov, Alim Karimov, Servet Gaziyev ve Seyran Murtaza) mahkeme oturışı mahkemelengenler hastalnğanı içün başqa künge deñiştirildi. Mahkemede Rusiye FSİN-niñ FKUZ FVN-den 2021 senesi iyünniñ 24-ü tarihlı bir malümatnamesi ilân etildi. Oña köre Gaziyevni yüksek sıcağı ve keskin nefes virus yuqunçı sebebinden etap etmek mümkün degil. Aynı malümatname Osmanov Erfanda. Qanunsız sürette tevqif etilgen Ukraina vatandaşlarınıñ sağlıq alı aqqında bilmek içün advokat SİZO müdiriyetinen korüşmege istedi, amma COVID-19 sebebinden tayin etilgen karantin rejimi içün körüşip olamadı. Şunıñ içün, Servet ve Erfan koronavirusqa oğrağanlarını tahmin etmek mümkün!» – dep qayd etti o.

Denisova, SİZO müdiriyetiniñ areketleriniñ BMT-niñ İqtisadiy ve İçtimaiy Şurası tarafından tasdıqlanğan mahkemelengenlernen davranuv qaideleriniñ 22-nci maddesini ve Dünya sağlıq saqlav teşkilâtınıñ ve İskencelerge qarşı BMT komitetiniñ tevsiyelerini boza dep bildirdi.

Rusiyeniñ Cenübiy bölgesiniñ arbiy mahkemesinde Aqmescit «Hizb ut-Tahrir» davası ile bağlı oturış, dava iştirakçileri olğan Servet Gaziyev, Cemil Gafarov ve Erfan Osmanovnıñ sağlıq alı sebebinden tarihı deñiştirildi, dep haber etti advokat Ayder Azamatov.

Rostov vilâyeti Rusiye İnsan aqları vekâletlisiniñ apparat reberi Vladimir NekrasovAqmescitteki ekinci «Hizb ut-Tahrir davasınıñ» mabüsi Servet Gaziyevniñ sağlıq vaziyeti fenalaşqanı içün tibbiy teşkerüv keçirmek talabınen muracaat yolladı. Ukraina ombudsmanı Lüdmila Denisova Rusiye insan aqları vekâletlisi Tatyana Moskalkovağa muracaat etip, Gaziyevniñ aqlarını ğayrıdan tiklemege, oña kerekli tibbiy yardım köstermege ve sağlıq vaziyeti sebebinden sıñırlav tedbirini deñiştirmege talap etti.

Rostov-na-Donu (Rusiye) mahkemesi yaramağan dava mabüsi Servet Gaziyevniñ sağlıq vaziyeti sebebinden Aqmescitteki ekinci «Hizb ut-Tahrir davasınıñ» oturışuvını başqa künge qaldırğan edi. Oña yatıp raatlanmağa tevsiye etilgen edi.

Mayısnıñ 13-nde Rostov-na-Donu mahkeme oturışuvında Servet Gaziyev yaramağan edi. «Acele yardım» feldşeri bir qaç ağrı kesici ine urdı, amma Gaziyev mahkeme soñuna qadar raatsızlanğan edi. Martnıñ 30-nda Gaziyevniñ aşqazan ağrıları sebebinden de mahkemege «acele yardım» çağırılğan edi.

2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Rustem Şeyhaliyev, Osman Arifmemetov ve Remzi Bekirov bar ediler.

2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.

OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.

Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.

«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.

Qırımdaki «Hizb ut-Tahrir davaları»

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG