Dünyanıñ çeşit memleketleriniñ diplomatik temsilcilikleri iyünniñ 26-nda qırımtatarlarnıñ milliy bayrağını kötere.
Çeh Cumhuriyetiniñ paytahtı Pragada Ukraina elçihanesinde qırımtatar bayrağı köterildi. Bu aqta Ukraina elçisi Yevğen Perebıynis Twitterde bildirdi.
Vilnüste qırımtatar bayrağı Litvaniya Tış işler nazirligi ögünde köterildi, dep bildirdi nazir Linas Linkâviçüs.
Ukrainanıñ Belçika ve Finlândiya elçihaneleri de hayırlavlarğa qoşuldı.
Bundan ğayrı, Ukraina ve qırımtatar bayraqları Cezairde köterildi.
Ukrainanıñ OSCE ve BM temsilcilikleri Ukraina Tış işler nazirliginiñ Qırımtatar bayraq kününe bağışlanğan videosını derc etti.
Ukraina prezidentiniñ ofisinde iyünniñ 26-nda qırımtatarlarnı milliy bayraq kününen tebriklep, Rusiye apsinde tutulğan faaller aqqında hatırlattılar.
Qırımtatarlar cuma künü, iyünniñ 26-nda, Milliy bayraq kününi qayd ete.
Qırımtatar Milliy Meclisiniñ reisi Refat Çubarovnıñ bildirgenine köre, Ukraina Tış işler nazirligi dünya boyunca memleket elçihanelerine Qırımtatar bayraq kününde, iyünniñ 26-nda, Ukraina devlet bayrağınen beraber qırımtatarlarnıñ bayrağını kötermege vazife berdi.
Kyivde avtoyürüş ve aqşam üstü tantanalı yürüş ve büyük qırımtatar bayrağınıñ çıqarıluvı planlaştırıla.
Qırımtatar resurs merkeziniñ reberi Eskender Bariyevniñ qayd etkenine köre, Kreml kontrolindeki Qırım akimiyeti qırımtatar faallerine qarşı çift standartlarnı qullana. Böylece, iyünniñ 26-nda Qırımtatar bayraq künü munasebetinen aktsiyalarnıñ keçirilüvine keder etmege tırışa.
Mayısta qomşu Rusiyeniñ «Ekstremist faaliyeti ile küreş» 16-ncı qanunınıñ maddesine köre «qanun bozulmaycağına dair» tenbi kâğıtı 60 insanğa ketirildi. Olarnıñ arasında advokat, aq qorçalayıcı, bir kişilik piketlerniñ iştirakçileri, Qırımtatar Milliy Meclisiniñ azaları, «Qırım birdemliginiñ» falleri bar.
Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın tamğa tasvir etilgen kök renkli bir bayraqtır. Tantanalı tedbirler em Qırımda, em esas Ukrainada, em çetele ötkerile.
