Qırımtatarlar cuma künü, iyünniñ 26-nda, Milliy bayraq kününi qayd ete.
Qırımtatar Milliy Meclisiniñ reisi Refat Çubarovnıñ bildirgenine köre, Ukraina Tış işler nazirligi dünya boyunca memleket elçihanelerine Qırımtatar bayraq kününde, iyünniñ 26-nda, Ukraina devlet bayrağınen beraber qırımtatarlarnıñ bayrağını kötermege vazife berdi.
Tedbirler keçirilecek memleketler arasında Çubarov Bulğaristan, Türkiye ve ABDni qayd etti.
Qırımtatar Milliy Meclisi Fastov şeer yolbaşçılığınen beraber Ukraina şeerleri birliginiñ reberligine muracaat etip, şeerlerniñ şeer şurası binalarında devlet bayrağınen beraber qırımtatar bayrağını kötermege teklif etti.
Bu künü Kyivde avtoyürüş ve aqşam üstü tantanalı yürüş ve büyük qırımtatar bayrağınıñ çıqarıluvı planlaştırıla.
Qırımtatar bayraq kününe bağışlanğan tedbirlerniñ teşkilâtçıları merasim vaqtında qullanılacaq qoruv vastaları aqqında hatırlattı – maska, qolçaq, ve koronavirus pandemiyası sebebinden kerekli mesafeni qorumağa çağırdılar.
Faaller işğal altındaki Qırımda Qırımtatar bayraq kününe bağışlanğan «Bayraq areketi» aktsiyasını ötkere. Yarımadanıñ çeşit rayonlarında yaşağan qırımtatar milliy areketiniñ veteranlarını ziyaret etmege qarar aldılar. Qırımtatar faali Nariman Celâlnıñ bildirgenine köre, faallerniñ maşinalarını bir qaç kere Rusiye patruli toqtatqan edi.
Qırımtatar resurs merkeziniñ reberi Eskender Bariyevniñ qayd etkenine köre, Kreml kontrolindeki Qırım akimiyeti qırımtatar faallerine qarşı çift standartlarnı qullana. Böylece, iyünniñ 26-nda Qırımtatar bayraq künü munasebetinen aktsiyalarnıñ keçirilüvine keder etmege tırışa.
Mayısta qomşu Rusiyeniñ «Ekstremist faaliyeti ile küreş» 16-ncı qanunınıñ maddesine köre «qanun bozulmaycağına dair» tenbi kâğıtı 60 insanğa ketirildi. Olarnıñ arasında advokat, aq qorçalayıcı, bir kişilik piketlerniñ iştirakçileri, Qırımtatar Milliy Meclisiniñ azaları, «Qırım birdemliginiñ» falleri bar.
Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın tamğa tasvir etilgen kök renkli bir bayraqtır. Tantanalı tedbirler em Qırımda, em esas Ukrainada, em çetele ötkerile.
