Kreml kontrolindeki Qırım akimiyeti qırımtatar faallerine qarşı çift standartlarnı qullana. Böylece, iyünniñ 26-nda Qırımtatar bayraq künü munasebetinen aktsiyalarnıñ keçirilüvine keder etmege tırışa.
Bu fikirni Qırımtatar resurs merkeziniñ reberi Eskender Bariyev Qırım.Aqiqat Radiosınıñ yayınında iyünniñ 24-nde Keriç, Aqmescit ve Aqyarda keçirilgen Rusiye paradlarını izaatlap bildirdi.
«Karantin tedbirleri lâğu etilmedi, amma yarımadanıñ üç şeerinde iyünniñ 24-nde pek çoq insan toplaştı. Aynı vaqıtta, bir qaç künden berli qırımtatar faallerine Qırımtatar bayraq kününen bağlı bir de bir tedbir keçirilmeycegine dair ihtarlar ketirile», – dep qayd etti Bariyev.
Onıñ malümatına köre, Rusiye quvetçileri bu tenbilerni fevralniñ 26-sı – Qırımnıñ Rusiye işğaline qarşı tirenüv künü, mayısnıñ 18-i – Qırımtatar sürgünliginiñ qurbanlarını añma künü arfesinde de ketire.
«Yani karantin tedbirlerine baqmadan, bazı insanlarnıñ aktsiyalarına qol tutalar, qırımtatarlarnı toplap olğanlarnı ise evelden qorquzmağa tırışalar», – dep tüşüne Qırımtatar resurs merkeziniñ reisi.
Qırım.Aqiqat mühbiriniñ bildirgenine köre, iyünniñ 24-nde Aqmescitte sovet bayraqlarınen avtokolonnalar keçti, maşinalardan cenk yırları yanğıradı. Maşinalardan biri Aqmescitniñ Nikolayevka tarafındaki çıqışında toqtadı, ve aydavcısı sovetlerniñ lideri İosif Stalinniñ süreti ile bayraqnı açtı.
Qırımtatar faalleri ise Qırımda Qırımtatar bayraq kününe bağışlanğan «Bayraq areketi» aktsiyasını ötkere. Olar yarımadanıñ çeşit rayonlarında yaşağan qırımtatar milliy areketiniñ veteranlarını ziyaret etmege qarar aldı. Qırımtatar faali Nariman Celâlnıñ bildirgenine köre, olarnıñ maşinalarını Rusiye patruli bir qaç kere toqtattı.
Mayısta qomşu Rusiyeniñ «Ekstremist faaliyeti ile küreş» 16-ncı qanunınıñ maddesine köre «qanun bozulmaycağına dair» tenbi kâğıtı 60 insanğa ketirildi. Olarnıñ arasında advokat, aq qorçalayıcı, bir kişilik piketlerniñ iştirakçileri, Qırımtatar Milliy Meclisiniñ azaları, «Qırım birdemliginiñ» falleri bar.
Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın tamğa tasvir etilgen kök renkli bir bayraqtır. Tantanalı tedbirler em Qırımda, em esas Ukrainada, em çetele ötkerile.
