Link açıqlığı

Saatnıñ esas haberi

Ukraina prezidentiniñ ofisi Rusiye apishanelerinde tutulğan qırımtatarlar aqqında hatırlattı


Ukraina prezidentiniñ ofisinde iyünniñ 26-nda qırımtatarlarnı milliy bayraq kününen tebriklep, Rusiye apsinde tutulğan faaller aqqında hatırlattılar.

«İşğal etilgen Qırımda Ukrainağa tam qol tutqan qırımtatarlar taqipke ve ayırımğa oğratıra, siyasiy mabüslerniñ çoqusı qırımtatarlardır. Server Mustafayev, Seyran Saliyev, ağa-qardaş Abdullayevler, Emir-Usein Kuku – episi vicdan mabüsi ola, eñ tez vaqıtta evlerine qaytmaları içün elimizden kelgenini yapacaqmız», – dep aytıla haberde.

Müessise qayd etkenine köre, qırımtatar bayrağı yarımada. Sakinlerine azatlıq ruhı ve Ukraina bayrağınıñ Qırımğa qaytuv küreşinde birlikni hatırlata.

«Eskisi kibi, Bağçasaray ya da Aqmescitte bir-biriniñ yanında dalğalanğan eki bayraqqa quvanayıq. Tarihiy adaletniñ ve Ukrainanıñ tamır halqı olğan qırımtatar halqı aqlarınıñ tiklenmesi içün elimizden kelgenini yapmaq bizim içün pek müim», – dep aytıla hayırlav sözünde.

Prezidentniñ ofisi eminliknen bildirdi ki, «altın tamğalı kök bayraq Çatırdağ ve Ay-Petride, Bağçasaray, Yalta ve Aqyarda dalğalanacaq».

Qırımtatarlar cuma künü, iyünniñ 26-nda, Milliy bayraq kününi qayd ete. Kyivde avtoyürüş ve aqşam üstü tantanalı yürüş ve büyük qırımtatar bayrağınıñ çıqarıluvı planlaştırıla.

Faaller işğal altındaki Qırımda Qırımtatar bayraq kününe bağışlanğan «Bayraq areketi» aktsiyasını ötkere. Yarımadanıñ çeşit rayonlarında yaşağan qırımtatar milliy areketiniñ veteranlarını ziyaret etmege qarar aldılar. Qırımtatar faali Nariman Celâlnıñ bildirgenine köre, faallerniñ maşinalarını bir qaç kere Rusiye patruli toqtatqan edi.

Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.

Qırımtatar bayrağı üzerinde altın tamğa tasvir etilgen kök renkli bir bayraqtır. Tantanalı tedbirler em Qırımda, em esas Ukrainada, em çetele ötkerile.

2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.

Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.

Aq qorçalayıcılar ve advokatlar bu cinaiy davalarnı siyasiy, milliy ya da diniy sebeplerden taqip dep adlandıra. Rusiye akimiyeti bu sebeplerni inkâr ete.

XS
SM
MD
LG