Qırımda Qırımtatar bayraq kününe bağışlanğan «Bayraq areketi» aktsiyası keçirile. Faaller yarımadanıñ çeşit rayonlarında yaşağan qırımtatar milliy areketiniñ veteranlarını ziyaret etmege qarar aldı.
Bu sefer faallerniñ maşinalarını bir qaç kere Rusiye patruli toqtattı. Bu aqta qırımtatar faali Nariman Celâl Qırım.Aqiqat mühbirine bildirdi.
«Saba meşur qırımtatar faali Remzi Ablayevni yoqladıq, soñra belli qırımtatar faali Lütfi Bekirovnen körüşmek içün Qurman rayonınıñ Alabaş Qoñrat (Amurskoye) köyüne doğru yol aldıq. Bu eki körüşüvde men de bar edim, ve Aqmescitten Alabaş Qoñratqa ketkende bizni birinci yol patrul hızmeti toqtattı. Bir-eki kilometrden soñ çette turğan yol patruli hızmetiniñ maşinası keçkenimizni körip, bir kereden areket etti ve artımızdan ketti. Lütfi Bekirovnıñ evi yanında bizni toqtatıp, vesiqalarımıznı baqqanlar ve bir şey aytıp olamadılar. Aytıp olamadılar, çünki kimseniñ bir qanunnı bozğanı yoq», – dep tarif etti Celâl.
Aktsiya çerçivesinde iştirakçiler 2016 senesi mayısnıñ 24-nde aqşam hırsızlanğan Bağçasaray şeer şurasınıñ sabıq deputatı, Dünya qırımtatar kongressi icra komitetiniñ azası Ervin İbragimovnıñ süreti ile qıyafet kiydi. Qırımtatar faalleri Ervinniñ olarnen beraber olğanını kösterdi, ve kelecek sene Qırımtatar bayraq kününi beraber qarşılaycaqlar, dep ümüt eteler.
Celâlnıñ aytqanına köre, Aqmescitten Canköyge ketkende yol patrul hızmeti maşinalarını üç kere toqtattı. Nariman Celâl emin ki, bu faallerge yapılğan basqı usullarından biri ola.
«Bunı Qırımdaki Rusiye akimiyeti, hususan FSB qurulışları, Ekstremizm ile küreş merkezi qırımtatar milliy areketi faalleriniñ er angi faalligine keder etmege tırışqanınen bağlayım. Em de Qırım işğali, Qırımda insan aqlarınıñ bozuluvınen bağlı fikrini açıq bildirgen, siyasiy mabüslerni qorçalağanlarğa keder etecek olalar – bu şahıslar belli», – dep qayd etti faal.
Celâlnıñ aytqanına köre, Rusiye politsiyasınıñ hadimleri faallerniñ maşinalarını ne içün o qadar toqtata sualine yol patruli hızmetiniñ hadimleri vesiqalar teşkerile, dep cevap berdi.
«Bayraq areketi» aktsiyası milliy areketniñ genç faalleriniñ teşebbüsinen başlatıldı. Üç yıldan berli keçirile. Gençler Qırımtatar bayraq kününden bir qaç kün ögüne Qırımnıñ çoqusı rayonlarını maşinalarnen dolaşıp, semetdeşlerinen körüşe. Er yıl formatı deñişe. Aktsiya Qarasuvbazar rayonındaki Aq Qaya seferinen yekünlene. O, qırımtatar bayrağınıñ Qırımda bütün qırımtatarlarnı birleştirgeniniñ timsali ola ve Qırım yarımadasında tarihiy yerde köterile.
Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın tamğa tasvir etilgen kök renkli bir bayraqtır. Tantanalı tedbirler em Qırımda, em esas Ukrainada, em çetele ötkerile.
