Rusiye ükümeti işğal altındaki Qırım yarımadasında koronavirus tedqiqleri içün laboratoriyalarnı donatmaq içün 20-den çoq million ruble ayırdı. Bu aqta Rusiye baş naziri Mihail Mişustinniñ emrinde aytıla.
Berilgen malümatqa köre, para yedek fondundan ayırıldı. Qırım 15 715 000 ruble, Aqyar ise 5 715 000 ruble alacaq.
Para qullanıluvını Rusiye Sağlıq nazirligi kontrol etecek. Müessise, 2021 senesi fevralniñ 1-ne qadar Rusiye ükümetine maruza bermeli.
Qırımda soñki künde COVID-19 diagnozı tasdıqlanğan altı hasta, Aqyarda üç kişi vefat etti.
Oktâbrniñ 31-nde saba Aqyarda 79 yañı koronavirus hastası qayd etildi, Qırımda – 227.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
