Qırımda dört künden berli künde 200-den çoq koronavirus hastası qayd etile. Bu aqta Qırımnıñ Rusiye ükümeti Telegramda bildire.
Oktâbrniñ 30-nda Qırımda 227 COVID-19 hastası qayd etildi, 40-ınıñ hastalıq alâmetleri yoq. 149-ı tibbiy yardım içün muracaat etkende qayd etildi, 74-ü daa evel qayd etilgen hastalarnen alâqada oldı, 4-ü başqa yerlerden keldi.
Keçken künü yañı koronavirus tedqiqlerini yapqan yarımada laboratoriyaları 5683 insannı baqtı. Bütün müddet devamında 5376 insan tüzeldi.
Bir kün evelsi Aqyarda 80 COVID-19 hastası qayd etildi. Bu yañı «rekord» oldı, dep bildire şeerniñ Rusiye ükümeti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
