Qırımda soñki künde COVID-19 diagnozı tasdıqlanğan altı hasta, Aqyarda ise üç hasta vefat etti. Bu aqta Rusiye kontrolindeki Qırım sağlıq nazirligi ve Aqyar ükümeti haber ete.
Böylece, Qırımda COVID-19-dan vefat etkenlerniñ sayısı 137 oldı. 3 835 kişi tedaviylenmege devam ete.
Aqyarda 72 ve 78 yaşında qadınlar ve 51 yaşında er adamı vefat etti. Üçüniñ de hronik hastalıqları ağırlaştı.
Oktâbrniñ 31-nde saba Aqyarda 79 yañı koronavirus hastası qayd etildi, Qırımda – 227.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
