Keçken künü Qırımda COVID-19 hastalarınıñ sayısı kene arttı – 389 yañı hasta, bir kün evelsi qayd etilgen hasta sayısından 14 kişi çoq oldı.
«273 hasta tibbiy yardım içün muracaat etkende qayd etildi, 99 kişi daa evel qayd etilgen hastalarnen alâqada oldı, 3 hasta çetelden keldi. Bir künde 282 insan yahşı oldı, bütün müddet devamında 51 795 insan tüzeldi», – dep bildirdi Rusiye kontrolindeki Qırım yolbaşçısı Sergey Aksenov içtimaiy ağlardaki saifelerinde.
Tünevin saba akimiyet qayd etilgen 375 yañı koronavirus hastası aqqında bildirdi. Qırımnıñ Rusiye sağlıq nazirligi avgustnıñ 4-nde 16 insan COVID-19-dan vefat etti, dep bildirgen edi.
Avgustnıñ 4-nde Qırım ve Aqyardaki Rospotrebnadzor idaresiniñ yolbaşçısı Natalya Penkovskaya yarımadada pandemiya vaqtında COVID-19-dan vefat etkenlerniñ sayısında rekord qayd etildi, dep bildirgen edi.
Qırımda avgustnıñ 1-nde koronavirus yuqunçınıñ tarqaluvınen bağlı yañı sıñırlavlar çalışıp başladı. Laf birinciden bala lagerleri aqqında kete.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
