Aqyarda dekabrniñ 18-nde saba 80 yañı COVID-19 hastası qayd etildi, 83 ve 88 yaşlarında eki hasta vefat etti, dep haber ete şeerniñ Rusiye ükümeti.
«18 insan yuqunç, doquzıncı ve birinci şeer hastahanelerine alındı, qalğanları ambulator tedaviylevde buluna. Hastalar – beş yaştan 88 yaşqa qadar insanlar. 82 kişi tüzelgen soñ yiberildi. Umumen yılnıñ başından Aqyarda 5682 insan yañı koronavirus yuqunçına oğradı. 5315 kişi tüzeldi, 187 insan vefat etti», – dep aytıla haberde.
Şeer akimiyetiniñ malümatına köre, 160 insan hastahalerde buluna, yengil hasta sayısı 182 oldı. 8 kişi ambulator tedaviylevde qala. 576 insan közetile.
Qırımda keçken künü 356 koronavirus hastası qayd etildi. Pandemiya vaqtında 20695 COVID-19 hastası qayd etildi, 15920 kişi tüzelip yiberildi, 407 insan vefat etti.
Rospotrebnadzor, Qırımda koronavirustan vefat etkenlerniñ sayısı arta, hususan 50-60 yaşlarında insanlar arasında, dep qayd ete. Vefat sayısı artmasınıñ esas menfiy sebebi – tibbiy yardım içün vaqtında muracaat etmeme ola, dep bildire müessise.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
