Link açıqlığı

Saatnıñ esas haberi

«Cemilevniñ davası»: eki şaat kelmegeni içün mahkeme oturışuvı başqa künge qaldırıldı (+video)


Mustafa Cemilev

Kreml kontrolindeki Ermeni Bazar şeer mahkemesi sentâbrniñ 25-nde «Cemilevniñ davası» boyunca mahkeme oturışuvını eki şaat kelmegeni içün başqa künge qaldırdı. Bu aqta advokat Nikolay Polozov bildirdi.

Mahkeme oturışuvnı oktâbrniñ 15-ne qaldırdı.

«Qabaatlav mahkemege sorğu içün Rusiye sıñır hızmetiniñ eki hadimi Knâzev ve Lışçikovnı çağırdı. Lâkin olar mahkemege kelmedi. Prokuror delillerni kösterüv nizamını deñiştirmege ve yazma ve eşyaviy delillerni baqmağa razı olmağanı içün mahkeme oturışuvnı oktâbrniñ 15-ne saat 9:30-ğa qaldırıp, bu şaatlarğa tekrar haber etmege qarar aldı», – dep bildirdi Polozov.

Onıñ qayd etkenine köre, bu şaatlar tekrar kelmese, imaye tarafı olarnı mahkemege zornen ketirmege rica etecek.

Qırımdaki Rusiye Tahqiqat komitetiniñ idaresi aprelniñ 13-nde qırımtatar halqınıñ lideri Mustafa Cemilevni Rusiye Ceza kodeksiniñ üç maddesine köre qabaatladı. Advokat Nikolay Polozovnıñ aytqanına köre, şimdi Cemilevge qarşı oğlu Hayserniñ ukrain davası qullanıla.

Qırım ve Aqyardaki Rusiye Tahqiqat komiteti mayısnıñ 27-nde bu davanıñ tahqiqatını bitirdi.

Cemilevniñ fikirince, işğal etilgen Qırımda Rusiye FSBsi tarafından oña qarşı açılğan dava qırımtatarlarnı yarımadadan çıqarmaq içün qullanıla.

Ukraina prezidentiniñ Qırım Muhtar Cumhuriyetindeki temsilciligi Rusiye tahqiqatçılarınıñ qırımtatarlarnıñ milliy lideri Mustafa Cemilevge qarşı cinaiy davasını siyasiy taqip dep saya.

Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.

Mustafa Cemilev 1991 senesi Qırımğa qaytıp oldı.

III-IX çağırılış Ukraina Yuqarı Radasınıñ halq deputatı ola.

Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.

2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.

XS
SM
MD
LG