Rusiye akimiyeti mayısnıñ doquzına eki afta qalğanda «Zafer künü» tedbirlerini kütleviy şekilde lâğu etip başladı. Rusiye regionlarında ve işğal etilgen Ukrayına topraqlarında parad, salüt ve «Ölümsiz polk» yürüşleri olmaycaq. Çoqusında sebep bu: hatıra ve ananeviy tedbirler «vatandaşlarnıñ telükesizligi» içün lâğu etile, dep yaza «Nastoyaşçeye Vremâ» telekanalı (Amerikanıñ Sesi iştirakinen RFE/RL şirketi tarafından quruldı).
Moskvada ise mayıs doquz yürüşi olacaq, amma o da sıñırlı. Meselâ, keçken yıllarğa köre arbiy tehnika qat-qat az olacaq – umumen 75 dane (meselâ, 2021 senesi 200 dane bar edi). Bu raqamnı Rusiye mudafaa naziri Sergey Şoygu seslendirdi, aslında ise daa az ola bile.
2023 senesi o, Qızıl meydanda 125 dane tehnika olacaq, dep vade etken edi, aslında ise tek 50 dane bar edi.
Azatlıq Radiosı bildirgenine köre, paradda tank ve zırhlı maşina sayısınıñ eksilmesi cebede «yañılıqlar» olmağanınen bağlı, Rusiye akimiyeti tenqit etilmek istemedi.
OSINT-talilcisi Oliver Aleksanderniñ 2023 senesi paradı aqqında yazıp, tantanalı yürüş tahminen 45 daqqa devam etti, ordu areketi ve Vladimir Putinniñ çıqışınen beraber, keçken yılları paradlar bir buçuq saat qadar ola edi, amma ava qısmı da bar edi, o yıl ise (2023 – NV) lâğu etildi.
2024 senesi Moskvada ava qısmını qaytarmağa qarar bergenler. Amma 2022 senesi olğanı kibi soñ anda lâğu ete bileler. Resmiy sebep – yaramay ava. 2023 senesi aviatsiya qısmı ya da onıñ lâğu etilüvi aqqında aytılmadı bile – o, iç olmadı.
Parad işğal altındaki Qırımda da lâğu etildi. Qırımnıñ Rusiye yolbaşçısı Sergey Aksenov Telegram kanalında yazğanına köre, «bu telükesizlik teminlevi meselelerinen bağlı. Lâkin veteranlarımızğa ürmetimizni kösterecekmiz.
Rusiyede Belgorod, Brânsk, Kursk, Râzan ve Pskov vilâyetlerinde paradlar lâğu etildi. Bu yerler Ukrayına tarafından cevap darbelerine çoq oğradı. Ve lâğu etüvniñ sebebi er yerde aynı – işğal etilgen yarımadada kibi – telükesizlik meselesi.
Amma Belgorodda, meselâ, «Ölümsiz polk» yürüşi yerine Ekinci cian cenki iştirakçileriniñ fotosüretleri avtobuslarda olacaq.
Brânsk vilâyetinde yürüşni online rejimde yapmağa tüşüneler. Tomsk vilâyetinde mayısnıñ 9-nda ofitsiantlarnı Ekinci cian cenki iştirakçileriniñ fotosüretlerinen urbağa kiydirmege teklif etildi, amma restoranlar razı olmadı. Kursk vilâyetiniñ valisi Roman Starovoyt yerli sakinlerge cenkleşken aqrabalarınıñ süretlerini ev pencerelerinde ve maşina camlarında asmağa teklif etti.
Suv basuvından zarar körgen ve büyük masraflarğa oğrağan Örenburgda ise, sakinleriniñ aytqanına köre, parad olacaq. Anda eki buçuq biñ bayraq, bayraq ipleri ve trolleybuslar içün bayram pannosını almaq içün tender ilân etildi. Yürüş merkeziy meydanda olacaq. Suv basuvından zarar körgen Kurgansk vilâyetinde de tedbirler lâğu etildi.
MALÜMAT: Ukrayınağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayına şimalinde faal olğanını toqtattı, dep bildirdi. Tezden Ukrayına akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayınağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
