Link açıqlığı

Saatnıñ esas haberi

Cemilev: «Zelenskıyden qırımtatar muhtariyetinen bağlı tam cevap alamadım»


Mustafa Cemilev
Mustafa Cemilev

Qırımtatar halqınıñ lideri, Ukraina halq deputatı Mustafa Cemilev yañı saylanğan Ukraina prezidenti Volodımır Zelenskıyden qırımtatar muhtariyetiniñ tasdıqlanuvınen bağlı Ukraina Anayasasına deñişmelerniñ kirsetilüvine dair tam bir cevap alamadı, dep bildirdi. Bu aqta o, Qırım.Aqiqatnıñ beş yılı munasebetinen keçirilgen «Ukrain cemiyeti ve Qırım – kelecekke baquv» açıq munaqaşası vaqtında ayttı.

«Ne yazıq ki, Petro Poroşenko vaqtında Ukraina Anayasasına Qırım Muhtar Cumhuriyetiniñ şekilsiz muhtar cumhuriyetten milletniñ unitar devlet içinde kelecegini belgilev aqqına dair halqara normalar esasında milliy-territorial cumhuriyetke deñiştirilüvinen bağlı deñişmelerni kirsetip olamadıq», – dedi Cemilev.

O, Ukraina prezidenti saylavlarınıñ ekinci turı ögüne Zelenskıyden milliy-territorial cumhuriyetniñ ğayrıdan tiklenmesine nasıl baqa dep sorağanını hatırlattı.

«Buña qarışıq bir cevap berdi. Qırımtatar halqınıñ ağır taqdiri, olarnıñ vatanperverligi ve al-azırdaki baqışları içün işğal bitken soñ qırımtatarlarğa inkişafları içün şaraitler yaratılmalı, dedi. Bu sualge tam bir cevap alamadım», – dep qayd etti Cemilev.

Cemilev «yañı saylanğan prezidentniñ Qırım işğalini ve referendumnı iç bir vaqıt tanımaycağını ve Donbasta barışıq olması içün Qırımnen bağlı bazarlıq etmeycegini» aytması onı memnün etti.

Daa evel Cemilev Qırım.Aqiqatqa qırımtatarlar Volodımır Zelenskıyge «konstruktiv muhalifette» olacaq, dep bildirdi.

Cemilev tele alıp barıcısı ve şoumen Volodımır Zelenskıyge muracaat etip, oña işğal etilgen Qırımnen bağlı beş sual bergen edi.

Zelenskıynıñ taqımı qırımtatar halqı lideriniñ açıq muracaatına cevap berdi.

2018 senesi dekabr ayında prezident Poroşenko Ukraina devleti terkibinde qırımtatar milliy-territorial muhtariyetiniñ qurulmasınen bağlı Anayasa deñişmeleri qanunını Yuqarı Radağa kirsetmege azır olğanını bildirgen edi. Aynı vaqıtta, prezidentniñ aytqanına köre, o vaqıt parlamentte bu qararnı qabul etmek içün 300 rey olıp olmağanına dair malümatı yoq edi.

Ukraina haber siyaseti naziriniñ birinci muavini Emine Ceppar qırımtatar muhtariyetiniñ «separatizmge iç bir alâqası yoq» dep añlatqan edi. Onıñ qurulması ise Ukrainanıñ 2014 senesi qoşulğan BM tamır halqlarnıñ aqlarına dair beyannamesinde qayd etilgen tamır halqnıñ aqqı ola.

XS
SM
MD
LG