Qırımtatar halqınıñ lideri, Ukraina halq deputatı Mustafa Cemilev qırımtatarlar, ilk malümatqa köre, Ukraina prezidenti saylavlarında ğalebe qazanğan Volodımır Zelenskıyge «konstruktiv muhalifette» olacaq, dep bildirdi. Bu aqta Cemilev aprelniñ 22-nde Qırım.Aqiqatqa ayttı.
«Bizler – Petro Poroşenkonıñ taqımı – ve qırımtatarlar oña faal sürette qoltutalar. Bes-belli, bizler muhalifette, amma konstruktiv muhalifette olacaqmız. Yañı prezidentniñ devletniñ hayrı içün yapacaqlarında ve doğru meselelerde oña qoltutacaqmız. Amma bizim ğayelerimiz, Ukraina devletine, halqımızğa zıt bir şey olsa, indemeyip oturmaycaqmız», – dep ayttı Cemilev.
Cemilevniñ bildirgenine köre, al-azırda Ukraina içün müim olğan şey – istiqrarnı saqlap qalmaqtır.
Daa evel Cemilev Ukraina prezidenti namzeti, tele alıp barıcısı ve şoumen Volodımır Zelenskıyge muracaat etip, oña işğal etilgen Qırımnen bağlı beş sual bergen edi.
Zelenskıynıñ taqımı qırımtatar halqı lideriniñ açıq muracaatına cevap berdi.
Merkeziy saylav komissiyasınıñ ilk malümatlarına köre, Volodımır Zelenskıy Ukraina prezidenti saylavlarında reylerniñ 73%-ını qazanıp ğalip çıqa. Devletniñ şimdiki yolbaşçısı Petro Poroşenko reylerniñ 25%-ını qazana.
Aprelniñ 21-nde Ukraina prezidenti saylavlarınıñ ekinci turı keçirildi. Saylayıcılarnıñ 62,07%-ı rey berdi.
Merkeziy saylav komissiyası 2019 senesi mayısnıñ 1-ne qadar saylavlarnıñ soñki neticelerini çıqarmalı. Yañı saylanğan prezidentniñ inauguratsiyası iyünniñ 3-ne qadar keçirilmeli.
