Rusiye akimiyeti tarafından kontrol etilgen Ermeni Bazar şeer mahkemesi qırımtatarlarnıñ milliy lideri Mustafa Cemilev davası boyunca imayeniñ altı muracaatından beşini red etti, dep haber ete Qırım.Aqiqat mühbiri.
Kreml kontrolindeki qadı Venera İsroilova Hayser Cemilev, Refat Çubarov, Ahtem Çiygoz, Lenur İslâmov ve Mihail Şeremetni imaye şaatları olaraq mahkemege davet etmege razı olmadı.
«Biz muracaatlar berdik, ve mahkeme oturışuvı olarğa ketti. Tedqiq etken videolarımızda olğan Ahtem Çiygoz, Refat Çubarov, Lenur İslâmov ve Mihail Şeremetni çağırmağa rica ettik. Faqat mahkeme olarnı şaat olaraq davet etmege razı olmadı, çünki videolarda olsalar bile, mahkeme bu insanlar aytılğan şahıslar olıp olmağanını bilmey», – dep izaatladı advokat Nikolay Polozov.
Qırım.Aqiqat mühbiriniñ malümatına köre, qadı İsroilova vaqialarnıñ iştirakçileriniñ şahsiyetlerini bilmek içün fotosüret ekspertizasını keçirüv muracaatını red etti.
Bunıñnen beraber, mahkeme imaye tarafınıñ şaatı olaraq Sergey Abisovnı davet etmege izin berdi – 2014 senesi mayısnıñ 3-nde o, Qırımnıñ Rusiye İç işler naziri edi.
Qabaatlav tarafı bugünki mahkeme oturışuvında delillerini berip bitirdi, Kreml kontrolindeki prokuror Nikita Homenko Hayser Cemilevni qabaatlav şaatı olaraq çağırmağa razı olmadı.
Rusiye kontrolindeki Ermeni Bazar şeer mahkemesi «silâ parçalarını qanunsız saqlağanında» qabaatlanğan qırımtatarlarnıñ milliy lideri Mustafa Cemilevge qarşı cinaiy davanı toqtatmağa razı olmadı.
Aprelniñ 15-nde Ermeni Bazar mahkemesiniñ oturışuvında qabaatlav tarafı Cemilevniñ 2014 senesi mayısta Qırım ve Herson vilâyetiniñ memuriy sıñırını qanunsız keçüv davasınen bağlı video delillerini kösterip bitirdi.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Hatırlatamız, qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi. Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
