Rusiye kontrolindeki Ermeni Bazar şeer mahkemesinde ğıyabiy şekilde mahkeme etilgen qırımtatarlarnıñ milliy lideri Mustafa Cemilevniñ davası boyunca eki imaye şaatı sorğuğa çekildi, dep bildire Qırım.Aqiqat mühbiri.
Hususan, Mustafa Cemilevniñ ve oğlu Hayser Cemilevniñ davası boyunca tahqiqat keçirgen tahqiqatçı Magomed Magomedov ve Qurultay Teftiş komissiyasınıñ reisi Ali Özenbaş sorğuğa çekildi.
«Bugün tahqiqatnı yekünlegen ve cinaiy dava malümatını azırlağan tahqiqatçı Magomedovnı sorğuğa çekip oldıq. Tahqiqatçı çoq şey aytmadı, dava malümatlarını hatırlamay, dep ayta. O, devlet sıñırı aqqında suallerge ve Mustafa Cemilev saqlağanında qabaatlanğan patronlar vatandaşlar arasında yasaqlanamı sualine cevap berip olamadı. Lâkin mahkemege cinaiy dava nasıl tahqiq etilgenini köstermek maqsadını o, yerine ketirdi», – dep bildirdi advokat Nikolay Polozov Qırım.Aqiqatqa.
Aprelniñ soñunda Ermeni Bazar şeer mahkemesinde Cemilevniñ davası boyunca şaatlarnı sorğuğa çekip başladılar. Sorğuğa çekilgen ilk kişi qırımtatar faali Zair Smedlâ oldı.
Rusiye FSBsiniñ baş idaresi, tahqiqat idaresine Ermeni Bazarda ğıyabiy şekilde mahkeme etilgen qırımtatarlarnıñ milliy lideri Mustafa Cemilevniñ davası boyunca Ukraina uquq qoruyıcılarına muracaat etmesini yasaqladı.
Ermeni Bazar mahkemesi imayeniñ talabınen FSB hadimini davet etmege razı oldı.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi. Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
