Qırımda "gaz borusındaki diversiyada" şübheli sayılıp apiske alınğan qırımtatar siyasetçisi ve faali, Qırımtatar Milliy Meclis reisiniñ birinci muavini Nariman Celâl ve ağa-qardaş Aziz ve Asan Ahtemovlar ve olarnıñ advokatları cinayet davanıñ materiaları ile tanışmaqnı tamamlağanları aqqında protokol imzaladılar. Endi tahqiqt qabaatlavnı Qırımnıñ prokuraturasına yollaycaq. Bunı advokat Nikolay Polozov haber etti.
"Narimannıñ qabaatlavına kelgende, tahqiqatnıñ dava materialarına qoşqan bütün deliller maddiy ve obyektiv degil, olar bellisiz - gizli şahıslarnıñ sözlerinden yazıp alınğan", – dedi Polozov.
Onıñ bildirgenine köre, onıñ (Celâlnıñ – QA) qabaatını isbatlağan diger deliller yoq.
"Yahşı bir yanaşma. Deliller olmasa, olarnı doğrulığını teşkermek mümkün olmağan gizli şaatlarnı celp etip yapalar. Tırışmaq da kerek degil, tahqiqatçılarnıñ areketlerine mahkeme nezareti asılında olmasa, prokurornıñ areketleri aqqında asla aytmayım", - qayd etti o.
Polozovnıñ qayd etkenine köre, bütün kerekli muracaatlar berilgen, amma tahqiqat olarnı qanaatlendirecegini beklememek mümkün.
"Nariman hayallar qurmay, amma aqiqat ve adalet oğrunda küreşmege niyetinde. Öz içün degil, epimiz içün. O er keske selâmlar ayta ve ruhtan tüşmemege tiley", - dep haber etti advokat.
Rusiye nezaretinde olğan Aqmescitteki Kiyev rayon mahkemesi Nariman Celâl ve ağa-qardaş Aziz ve Asan Ahtemovlarnıñ tevqif müddetini uzattı.
Dekabrniñ 15-nde advokat Nikolay Polozov Qırımda Rusiye quvetçileri Anğara köyünde «gaz borusındaki diversiya» davası boyunca ilk tahqiqatnı yekünledi, Nariman Celâlğa daa bir qabaatlav qoşuldı, dep bildirdi.
Noyabrniñ 8-nde Celâl patlayıcı cihaznıñ qaçaqçılığında da qabaatlandı. Oktâbrniñ 28-nde faalniñ SİZOda qaluv müddeti 2022 senesi yanvarniñ 23-ne qadar uzatıldı.
Dekabrniñ 3-nde Rusiye kontrolindeki Qırım Yuqarı mahkemesi Celâlnıñ apiste tutuv müddetini uzatuv qararına qarşı istinaf şikâyetini red etti.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
