Canköy rayonınıñ Bay Könçek (Oktâbr) köyüniñ sakinleri qırımtatarlarğa qarşı işkence ve repressiyalarnı toqtatmağa talap ete, dep haber ete «Qırım birdemligi» cemaat birleşmesi.
«Bütün analarnıñ canları qıçıra. Bu, bütün halqnıñ ağrısıdır. Nariman (Ametov – QA) ile videonı ağlap baqqan soñ raat yuqlamağa mümkün degil. Epimizniñ oğullarımız, qızlarımız bar. Yarın bu belâ qapumızğa kelmeyceginiñ kefaleti qayda?», – dep ayttı video muracaatında köy sakini Dilâra Nimetullayeva.
Berilgen malümatqa köre, qadınlarnı qırımtatar faali Nariman Ametovğa qarşı yapılğan «qanunsızlıq» açuvlandıra.
Qırımtatar halqınıñ aqsaqalları qırımtatarlarğa qarşı işkence ve repressiyalarnı toqtatmağa talap etken edi.
Dekabrniñ 17-nde saba Eski Qırımda Rusiye quvetçileri qırımtatarı Nariman Ametovnıñ evini tintti. O, tutuldı, onı belli olmağan yerge alıp kettiler. Narimannıñ ömür arqadaşı Elmaz Ametova, aqayı qırımtatar faalleri Nariman Celâl ve ağa-qardaş Ahtemovlar qabaatlanğan Anğara köyünde «gaz borusındaki diversiyağa» alâqası bar olğanından şübheli sayıla, dep bildirdi. Advokatlar bu malümatnı tasdıqlamay. Soñra faaller «Ametovnıñ bulunğan yeri belli degil», dep bildirdi. O künü Ametov evine qayttı. Soñra FSB hadimleri tarafından elektrik aqımı vastasınen işkencege oğratıldı, dep bildirdi.
Qırım Muhtar Cumhuriyetiniñ prokuraturası Ametovğa qarşı işkence qullanılğanına dair malümat sebebinden qanun ve cenk adetleriniñ bozuluvınen (Ukraina Ceza kodeksiniñ 438-inci maddesiniñ 1-inci qısmı) bağlı cinaiy tahqiqat başlattı.
Rusiye FSBsi Nariman Ametovnıñ işkencege oğratılğanını tefsir etmey.