“Men özümni pek dülber is ete edim”. Camala - yüklülik ve oğul doğuvı aqqında

Camala - doğma qırımtatar olğan ukrain yırcısı. O “Eurovision-2016” yarışında ğalebe qazandı, “Golos” konkursında idmancı olaraq iştirak etti, bir qaç albom çıqardı, Kyiv şeyerindeki “Sport Sarayı”nda büyük solo kontsertini berdi. Qırım.Aqiqatqa eksklüziv intervyüsinde Camala, soñki yılda onıñ yaşayışı nasıl deñişkeni aqqında aytıp berdi. Yırcı, toy, yüklülik ve birinci doğğan balası aqqında öz şahsiy ikâyelerinen paylaştı.

- Bir yıl evelsi biz sennen subetleşken edik, o zaman sen endi yüklü ediñ, eken. Ne qadar çoq bunı gizlep oldıñ?

- Men o vaqıt daa büyük eycanda edim, çünki añlamay edim: körünemi, yoqmı, aytayımmı, yoqmı, nasıl eteyim de, olduqça çoq bunı gizleyim. Ebet, bundan sır yapmaq qıyın, çünki bütün vaqıt kontsertlerlerde, çıqaruvlarda. “Golos” yarışında menim zenaatdaşları, biraz tomalaqlaşqanımnı sezdi. İşte, soñundan, aytıp açıqlaycağımız aqqında qarar aldıq.

- Bala doğuvınen er qorantanıñ kün tertibi deñişe. Sen - içtimaiy bir insansıñ, kontsert, yayınlarda iştirak etesiñ... Seniñ, ğaliba, asıl ağırayaqlıq tatiliñ olmadı?

- Doğuruvdan soñ mende eki aftalıq, deyik, tatil oldı, bundan soñ “Golos” ve non-stop başlandı. Ekti afta men evde edim i ve o qadar bu müitke daldım ki, atta aqayım dey edi: “Belki, sen bir yerge bararsıñ?”. Men ise istemey edim. Maña o qadar güzel edi ki. Er şey keliştirilgen. Mında qundaq masası, mında beşik, mında men sallayım, mında yuqlayım, mında aşatam.Men özüme o qadar er şeyni qolaylaştırdım ve keliştirdim ki, evimizge er kelgen adamnıñ, atta yaqın insan olsa, kirgeni meni raatsızlay edi. Qısqası, tam uyğunlıq edi. Men bu sözni begenem, o oğlumnen ne qadar birlikte olğanımıznı dos-doğru ifade ete.

- Çıqaruvlarğa barmayıp, balanen daa çoq oturmağa imkânıñ olsa edi, ne qadarğa bu vaqıtnı uzatır ediñ?

- Ebet! Tasavvur etesizmi! Böyle aytacağımnı iç tahmin etmedim. Amma maña körüne ki, men biraz daa o alda qaldırsa ediler, men “sağlıqnen barıñız” der edim. Misal içün, belli yırcı Lorin Hill (Lauryn Hill). O, bala doğurğanından soñ, solo karyerasını bitirdi, evde balanen oturmaqtan zevq ala dep ayttı. Men de bunı duydım. Bu añlam o qadar mükemmel ki: doğuruv, balalar - bu dünyada barlığımıznı aqlay. Biz o qadar hata yapamız, olarda boğulamız. Yañı ayat dünyanı körse ise, añlaysıñ - bizden soñ yahşı bir şey qalacaq.

- Ağırayaqlıq tatilinden öyle tez çıqqanına aqayıñ ne dey?

- O, bu añlamda, o qadar “menim adamım” ki, o aman-aman meni evden itep çıqardı. Men bayağı vaqıt türkü yazmağanımı aytıp başladı, biz beraber bir yerlerge kezinip başladıq. O bu alımnı kördi - men meykap, perçem yapmay edim, maña ep bir edi, öyle de güzel edi. O közete edi, közete edi, soñ ise evden çıqmaq içün mahsus sebep uydura edi - de kinoğa barmaq, de dostlarımızğa, de bir yerni kezinmek.

- Kel, sen aqayıña bağışlağan “Lübıtı” türküñni hatırlayıq. Muzıkalı videosı, yani klip, toyuñızda çıqarılğan edi?
- Bu klip degil edi. Episi toyda toy videosını çeke, ve bizim de toyumıznı bütünley videoğa çektiler. Toyda daa men özüm yırladım. Videocılar begendi ve klip yapıp qoydılar. Muzıkalı kanal telefon etip, bu videonı almaq istegenini aytqanda taaciplendik. Men atta içtimaiy ağlarğa yüklegende, bu aileviy arhiv olğanını qayd ete edim. Men toyda bu türküni yaramay yırladım. Asıl itiraf etmey edim, amma bu menim eñ fena çıqışım edi. Nefesim tutula edi. Er kün bunı yapam, amma mında mikrofonnı alıp sözlerni unutqanımnı añladım, bu şok edi. Menim içün bu yañı men edi.

- Yüklülik vaqtında mot qalmaq mümkün olğanını kösterdiñ. Böyle qıyafetlerde hamilelik yapmağa qarar bergeniñ nasıl oldı?

- O vaqıt men özümni pek dülber seze edim. Men saba uyanıp, dülber olğanımnı añlay edim. Men dülber kiyinmege istey edim. O zamanlarda menim televizion yayınlarım sıq-sıq edi: “Golos” da, milliy saylav da. Menim, başqa yüklü apaylarğa köre, biraz çoqça mesülietim edi. Bunıñ içün, men bütün ağırayaqalı qadınlar içün cevap bermek istedim, kimse ağırayaqlığa solğan havuç, çirkin qız demesin. Bütün yüklülerni qorup,g üzel kiyinip-quşanmağa büyük şevqim bar edi. Biz stilistnen ufaq-tüfegine barğance, er şeyni tüşünip baqtıq. Sadece, farqlı ola bilecegini köstermek istedim.

- Doğuruvdan soñ depressiya - bu uyduruvmı?

- Men bilmeyim, men farqına barıp yetiştirmedim. Eminim, bu bar. Men o zaman İnstagramda, messencerde o arada bala tapqan apaylarnen yazıştım, olar öz keyflerini maña tasvir ete edi, ve kimerdeolarnıñ keyfi maña keçmesiñ dep, men sadece yazışmamıznı qapata edim. Ve nasıldır keder, ğam qaplay edi. Meni muzıka qorçalay edi. Bunıñ içün, doğru avalarnen uyanıñız. Qasevetli olsañız, pozitiv, müsbet, şeñ avalarnı diñleñ. Keyfiñiz yaramay olsa, efkârlı türkülerni diñlemeñiz.

- Sen 35 yaşını toldurğanda, 35 - bu 25 kibi, sadece endi er şeyiñ bar dep ayttıñ. Saña yetmegen bir şey barmı?

- “Yüksek sesli” körünir, amma - er şey bar. Daima bir şeyge ıntılmağa kerek. Bu ibareni mizahnen qabul etmek mümkün. “Er şey bar” ibaresinde men şahsiy yaşayışımnı közde tutam. “Eurovision”, albomlarım, menim ömrüm keçe, çapa, ve mende suratımnı tezleştirem. Daa çoq muzıka yazmağa isteyim. Özümni daa çoq açıq-açıqqa köstermek, daa çoq fikirlerni añlamaq, aqranlarımnıñ fikirlerini añlamaq, olarnı ne kederletkenini, olar ne tüşüngenini añlamaq isteyim. Bu pek qıyın iş. Yañı irişimlerge ıntıluv daa ögde. Er şeyni becermege pek isteyim.

- Sen öz 25 yaşına qaytar ediñmi?

- Yoq. Amma o vaqıt da güzel edi. 25 yaşında men “Novaya volna” (Yurmalada muzıkalı yarış) - QA) yarışına barğan edim ve soñ, avgust ayında 26-nı toldurdım. 25 yaşım acayip ve muvafaqiyetli edi. O vaqıtta da icat adımlarını yapmağa istey edim, amma şimdiki ikmetim yoq edi. Böylece, aytam da, yengillik, yaşlıq duyğusı sende bar, amma oña daa biraz tecribe, ikmet qoşulsa, adımlarıñ daa qattı ve özüñ daa emin olasıñ.