Link açıqlığı

Saatnıñ esas haberi

Buyruqlar - bar, izolâtsiya - yoq: Qırımda COVID-19 ile küreşke ekimniñ baqışı


Mında artıq ekimlerniñ bütün planlaştırılğan ameliyatlarını ve ziyaretlerini lâğu ettiler, Qırım ekimleri studentlerni yardımğa çağıra, koronavirus vaziyeti sebebinde endi 2620 adam nezaret altında buluna.

Resmiy kâğıt, buyruq ve emirlerge köre, vaziyet nezaret altında, Qırımda COVID-19 ile küreşmege sanki azır olğanları bildirile, dey Aqmescit Perinatal Merkeziniñ anesteziologı Sergey Dub, amma aslında elementar şeyler yapılmay. Ekimlerni ise bir şey raatsızlay - Qırım tibbiyetiniñ resursları yetmemek mümkün.

- Qırım hastahanelerinde şimdi vaziyet nasıl?

- Umumen, er vaqıt kibi, amma koronavirusnen bağlı bayağı emirler peyda oldı. Vesiqalar bar, amma keregi kibi icrası yoq. Şimdi Perinatal merkezi aqqında aytam, bütün hastahanelerniñ alına qıymet kesip olamayım. Sade bir misal: ellerni yuvmaq kerek - bu añlayışlı, kimse qarşı çıqmay, er vaqıt böyle edi, şimdi de buña daa ziyade diqqat ayıralar, amma - çeşmeniñ yanında silecek asılğan, o anda bütün kün asılıp tura ve işçilerniñ episi oña ellerini sürte. Böyle olmamalı, bir kerelik elbezler kerek: sürttiñ ve taşladıñ. Maskalar da bir kerelik degil. Bundan ğayrı daa kostüm ve respirator olmalı. Ebet, yüklülik - hastalıq degildir, amma patsiyentniñ intubatsiya etilmeli olğan bir vaziyet çıqa bile, menim ise kerekli derecede olğan qorumam yoq.

Sergey Dub
Sergey Dub

Menimce, karantinniñ daa evel, yarımadada birinci hastalar peyda olmağance, başlamaq kerek edi, amma ciddiy tedbirler şimdi bile daa yoq.

- Siziñce, ne içün karantinni başlamaylar?

Karantinniñ daa evel, yarımadada birinci hastalar peyda olmağance, başlamaq kerek edi, amma ciddiy tedbirler şimdi bile daa yoq

- Buña cevaplanmaq qıyındır, amma menimce bu siyasiy sebeplernen bağlı. Yaqında martnıñ 18-ini qutladılar, şimdi mayısnıñ 9-ı yaqınlaşa ya da daa nasıldır bayram, Rusiye içün ise bayramlar - siyasiy aletteir. Şübesiz, hastalarnıñ sayısı resmiy malümattan çoqça.

- Ya umumen, siziñce, Qırım hastahaneleri COVID-19 hastalarınıñ büyük sayısına azırmı?

- Bu, mehanik avalandırmağa ihtiyacı olğan hastalarnıñ sayısına bağlı olacaq. 100 adam olsa, bellesem, kerginlik olacaq, amma becerirler, 200 olsa - elbette, yoq.

Wuhande bala hastahanesi. Qıtay, 2020 senesi, mart 6
Wuhande bala hastahanesi. Qıtay, 2020 senesi, mart 6
Vaziyet er kün deñişe, amma neticeler - ne tedbirler ve ne qadar ciddiy şekilde tetbiq olunğanına bağlı. Menimce, şimdi olar keç qala, ne sebep ile bilmeyim - siyasetmi, basir olmamazlıqmı, aqılsızlıqmı

Bunıñ ne olacağını tahmin etmek qıyın, vaziyet er kün deñişe, amma neticeler - ne tedbirler ve ne qadar ciddiy şekilde tetbiq olunğanına bağlı. Menimce, şimdi olar keç qala, ne sebep ile bilmeyim - siyasetmi, basir olmamazlıqmı, aqılsızlıqmı. Amma, asılda, Qırımnı qapatmaq qıyın degil, uzun müddetli izolâtsiyada peyda ola bilecek yekâne mesele - erzaq teminatıdır, Qırımnı özüne yeterli qadar istisal etmey. Amma bu yalıñız eki-üç aftalıq ciddiy izolâtsiyadan soñ körünecek.

- Şimdi virus denişe ve zayıflaşa, dep çoq aytalar, onda siyrekçe öleler. Siziñce, Qırımda dünyada olğan aynı dalğa olacaqmı ya da azca ola bile?

"Krımskaya roza" zavodında antiseptiklerniñ istisalı
"Krımskaya roza" zavodında antiseptiklerniñ istisalı

- Tibbiy baqımdan, virus zayıflasması içün bir müddet keçmeli. Protsess böyledir: pek küçlü virus bedenge yuqıp, adamnı öldüre ve bu öldürici virus başqa adamğa keçmey. Yani, sağ qalğan ve daa yayılğan virus hastasını öldürmedi. Böylece virus zayıflaşa, amma bunıñ içün bir ay degil, bir yıl keçmeli. Telükeli ve adamnı öldürgen viruslar öle ve tarqalmay. Taşıyıcısını öldürmegen soyları ise - sag qala.

- Şahsen özüñiz ne tedbirlerni köresiñiz?

- Maska taqmaq kerek, 100% qurumasa da, 10%-ı da qorumadır. Añlamañız kerek, odada 10 sağlam adam olsa, ep bir olardan birisi özü de bunı bilmeyip hastanen qonuşqanı mümkün ve böylece özüniñ üstünde, ellerinde bilmeyip odağa virusnı ketirip, soñra birevnen selâmlaşsa, o virusnı başqa adamğa bere bile.

Bütün qorantamnı ögrettim, evge kelgende men ellerimni yuvam, duşta sabun ve fırçınen bedenimni yuvam ve yalıñız bundan soñ balalarınmı quçaqlayım, çünki men şeerde edim, hastahanede edim. Bugün hastalarnen yaqın olğan adamlarnı tayin etip olamaymız. Etrafımda episi hasta kibi areket etem, çünki men özümni ve qorantamnı qasevet etem.

XS
SM
MD
LG