"Bu, "Yekâne Rusiye"niñ yeñişi degil, muvafaqiyetsizligidir" – faaller Qırımda rusiyeli saylavlarnıñ neticeleri aqqında

Qırımda rusiyeli saylavlarda Qırım "Yedinaya Rossiya" ("Yekâne Rusiye") firqacıları, yerli parlamentte mandatlarnıñ 80%-ını aldım şeer şuralarında - 71%-ını. "Yekâne Rusiye", belediye rayonlarınıñ şuralarında özüne monopol temsilcilikni temin etti. Qırımnıñ rusiyeli başı Sergey Aksönov, "Yekâne Rusiye"niñ saylavlarda yeñişi evelden belli edi, dep ayttı.

Onıñ fikrince, sebeplerden birisi, "Yekâne Rusiye" keçken yıllar devamında köstergen, Qırım hayrına çalışmaq ve büyük ve qıyın meselelerni semereli çezmek qabiliyeti, ve partiya taqımınıñ namuskârlıq ve açıqlığıdır".

"Qırımnıñ qabarcılıqqa qarşı bürosı" cemaat birleşmesiniñ koordinatorı Andrey Mezin, rusiye Saylav komiteti ilân etken saylav neticeleri başqa şeyni köstere, dep saya.

"Yekâne Rusiye"niñ yeñişiniñ sadece eki sebebi bar: birincisi - saylavğa kelgen 26%-nıñ (Qırımnıñ rusiyeli Saylav komitetiniñ malümatına köre - 33% - QA), partiya elektoratınıñ - memurlar, quvetçiler, askerler ve olarnıñ qorantaları - tarafından temin etilmesi. Ekincisi - qırımlılarnıñ 74%-ınıñ saylavlarğa lâqayt olğanı", - dedi Qırım.Aqiqatqa Andrey Mezin.

Qırım oppozitsiya faali Aleksey Yefremov, saylavlarda neticege irişmek içün, memuriy resurs qullanılğan, dep saya.

"Partiya "yeñişi"niñ sebebi, mence, (büdjet işçilerini esabat bermege, bülletenlerniñ süretlerini köstermege mecburlağan ve kelgenlerni qayd etken) memuriy resursnıñ qullanuvı ve, er vaqıt kibi, sahtelev. Ekincisi - alternativ namzetlerniñ ve kerçek oppozitsiyanıñ yiberilmemesidir. Üçüncisi - saylav bölüklerine kelüv yerine, Qırımnıñ küneşli avası ve sıcaq deñizidir. Ve dörtüncisi - saylavcılarnıñ yorğunlığı, saylavlarda bir-de-bir şeyge tesir etmekte ümütsizligi ve olardan közü qaytuvı", - dedi Qırım.Aqiqatqa tefsir bererek faal.

Rusiye jurnalisti Oksana Yakubets, Qırımda "Yekâne Rusiye"niñ yeñişi aqqında laf yürsetmege sebep körmey.

"Muvafaqiyet yoq, qırımlılarnıñ faciası ve Qırımnıñ felâketi açıqtan-açıq körüne. Kenen şu qabarcılar akimiyette qaldı, kene şu kompetentsiyası olmağan adamlar cumhuriyet başlığında qaldı. Aksönov "yeñiş" degeni ise, evelden çizilgen shemalarnıñ kerçekleştirüvidir. Partiya işinde vefadarlıq yoq. Aksönov, saylav kampaniyası vaqtında iç bir partiya tedbirine qoşulmadı, bölgelerde 10-12-şer saat canlı yayında muşaverelerni alıp bara edi. Konstantinov, öz taqımınen rayonlarğa bara edi, amma tek elektoratnıñ yardımını almaq içün. Saylav strategiyası, yalan ve arzularnen tolu edi. Ne qadardır adam buña inandı", - aytıp berdi Qırım.Aqiqatqa jurnalist.

"Halq nezareti' ("Narodnıy kontrol") cemiyet birleşmesiniñ faali Yelena Gukova, Qırım.Aqiqatqa tefsir bergende, "Yekâne Rusiye", qırımlılar Qırımda rusiyeli saylavlarına inanmağanını sebebinden, ğalebe qazanğanını ayttı.

"Yekâne Rusiye", qırımlılar bu sahte saylavlarğa qoşulmağanları içün tek ğalebe qazandı. Saylavcılarnıñ 33% kelüvinen saylavlar, qırımlılar olarnıñ boykot etkenini köstere", - dedi faal.

"Azat Qırım" ("Svobodnıy Krım") cemiyet areketiniñ faali Emine İbraimovanıñ fikrince, Qırım saylavlarınıñ neticeleri - rusiye akimiyet partiyasıniñ yeñişi degil, muvafaqiyetsizligidir.

"Tam muvafaqiyetsizlikke tek "Yekâne Rusiye" yeñiş der. Qırımda halqnıñ o qadar közü qayttı ki, olar qırımtatarlarğa qoşulıp, saylavğa barmaqtan vazgeçti. Amma akimiyet, büdjet işçilerinen yahşı etip çalıştı: olar rey bergenleri aqqında esabat bermeli ediler, ocalar ise balalarnıñ ana-babaarını nezaret ete edi. Amma halq ep bir saylavnı boykot etti", - dedi Qırım.Aqiqatqa faal.

Malümatname​: Sentâbr 8-inde Rusiye akimiyeti Qırım ve Aqyarda Qırım parlamenti ve yerli şuralarnıñ saylavlarını keçirdi. Saylav neticesinde Qırım Devlet şurasınıñ yañı çağırışında LDPR – 10 mandat, RFKP – 5, "Yekâne Rusiye" – 60 alğanını qoştı.

Ukraina, ABD, Aropa Birligi ve dünyanıñ daa bir sıra memleketleri bu saylavlarnıñ qanuniyligini qabul etmey.