İlhaq etilgen Qırımda yarımadanıñ rusiyeli parlamentine ve yerli şuralarına rusiyeli saylavlar keçe, dep bildire Qırımnıñ rusiyeli saylav komitetiniñ malümatına esaslanıp "Krıminform" haber agentligi.
Beyanatqa köre, saat 8:00 başlap 20:00 qadar 1201 saylav bölügi çalışacaq: beş yıl müddetine yaratılğan 1163 danesi ve 38 muvaqqat – çoqusı hastahanelerde, bir danesi – Aqmescit SİZOsında ve daa bir danesi Aqmescit ava limanında.
Matbuatqa köre, şeerde yaşağan saylavcılarğa dört bülleten berilecek: eki danesi – Qırım parlamenti içün ("cumhuriy" ve bir mandatlı), daa ekisi – yerli idare organları (belediye ve bir mandatlı) içün. Köylerde yaşağanlarğa 3 bülleten berilecek: eki danesi – parlament saylavı içün, birisi – yerli idare organları saylavı içün.
Qırım parlamentine saylavlarda sekiz siyasiy partiyasınıñ (LDPR, Pensiyalılar partiyası, RFKP, "Patriotı Rossii" ("Rusiye vatanperverleri"), "Adaletli Rusiye" ("Spravedlivaya Rossiya"), "Rusiye Kommunistleri", "Yedinaya Rossiya" ("Yekâne Rusiye") ve "Rodina" ("Vatan")) 535 namzeti iştirak etecek.
"Cumhuriy cedvel"ge köre, Qırım parlamentinde 50 yerge 421 namzet bar, bir mandatlı bölüklerge köre 25 yerge – 114 namzet, olardan 10-u öz namzetlerini özleri teklif ettiler.
Parlament saylavları içün, "cumhuriy" cedvel saylavları ve bir mandatlı saylavlar içün 1 476 750-şer bülleten bastırıldı. Saylav yapraqları renklerinden farqlanacaq: "cumhuriy" cedvel - qırmızı, bir mandatlı - mavı.
Yerli idare organları saylavı bülletenleri de renklerinden farqlanacaq: şeer içün yekâne bölgeler boyunca - mor, bir mandatlı bölgeler boyunca - sarı; köyler içün çoq mandatlı saylav bölgeleri içün - yeşil. Olarnıñ bastırılğan sayısı 2 345 780 dane.
Bütün qırım boyunca yerli idare organları saylavlarına 5 584 namzet qayd etildi, denile matbuatnıñ beyanatında.
Rusiye akimiyeti, Qırım ve Aqyarda Qırım parlamenti ve yerli şuralarnıñ saylavlarını 2019 senesi sentâbr 9-ında keçire. Ukraina, ABD, Aropa Birligi ve dünyanıñ daa bir sıra memleketleri bu saylavlarnıñ qanuniyligini qabul etmey.
Daa evel Ukraina mebusı, "Avropa birdemligi" partiyasınıñ daa bir reisi İrına Geraşçenko, Ukrainanıñ Yuqarı Radasını, rusiyeli saylavlarnıñ neticelerini qabul etmemege çağırttı.
