Rusiye nezaretindeki Qırım Saylav komiteti, yerli parlamentke rusiyeli saylavlarnıñ soñ neticelerini ilân etti.
"Cumhuriy saylav bölgesi ve bir mandatlı saylav bölgesi boyunca Qırım Cumhuriyetiniñ Devlet şurasına saylavlarnı becerilgen, dep qabul etmek", – dep yaza saylav komitetiniñ başı Mihail Malışevniñ sözlerinde Krıminform saytı.
Qırım saylav komitetiniñ malümatına köre, parlamentke üç firqa keçe: saylavcılarnıñ 54,7% reylerini alğan "Yedinaya Rossiya" ("Yekâne Rusiye"), LDPR (16,84%) ve RFKP (8,22%). Bundan ğayrı, "Yekâne Rusiye" bütün bir mandatlı bölgelerde ğalebe qazanğanı bildirile.
Malışev, saylav neticesinde Qırım Devlet şurasınıñ yañı çağırışında LDPR – 10 mandat, RFKP – 5, "Yekâne Rusiye" – 60 alğanını qoştı.
Sentâbr 8-inde Rusiye akimiyeti Qırım ve Aqyarda Qırım parlamenti ve yerli şuralarnıñ saylavlarını keçirdi.
Ukraina, ABD, Aropa Birligi ve dünyanıñ daa bir sıra memleketleri bu saylavlarnıñ qanuniyligini qabul etmey.
