9 ay içinde dört qıtada 28 memleket – balaban (3-ke 4,5 metr) qırımtatar bayrağınıñ seyaatıdır. Yüzlernen şeerde bayraqnı qırımtatar ve ukrain diasporalarınıñ vekilleri, siyasetçi ve cemaat faalleri qarşılap yazı qaldırğan edi. Bugün ise, iyünniñ 26-nda Qırımtatar bayraq kününde, bu bayraq Kyivde açıldı. Böylece, Qırım işğali şaraitlerinde aqları oğrunda küreşke devam etken qırımtatarlarğa destek kösterildi.
Dünya boyunca farqlı milletlerden on biñlernen insan qırımtatar halqı ile birdemligini köstermek içün birleşti. «Bayraqnen birleşkenler - #LIBERATECRIMEA» teşkilâtçılarınıñ aytqanına köre, aktsiyanıñ maqsadı halqara toplulıqqa qırımtatar halqı, Rusiyeniñ Qırım işğali sebebinden qarşılaşqanları, Qırımda insan aqlarınıñ bozuluvı aqqında hatırlatmaq, tarif etmek ola.
Bu aktsiya Qırımdaki semetdeşlerimiz içün müim – olar işğalcinen bir özü qalmağanını körmek kereklerEskender Bariyev
Bu maqsadqa irişip oldılarmı? Bu sualge Azatlıq Radiosınıñ mühbirine şimdi çetelde yaşap bayraqnı qarşılağan ukrainalılar cevap berdi. Aktsiya koordinatorı, İrlandiyada yaşağan ukrain Mıkola Krutsıknıñ aytqanına köre, onıñ iştirakçileri işğal altındaki Qırımda qırımtatar ve ukrain faalleriniñ problemlerine çeşit memleketlerniñ siyasetçi ve intellektuallarınıñ diqqatını celp etti; bir çoq memlekette aktsiyağa Ukraina diplomatları da qoltuttı, dep qayd ete Krutsık.
«Ukraina ögünde olğan telüke ve meselelerni al etmek içün bizler – ukrain, qırımtatarlar, diger milletler – birleşkenimizni dünya toplulığına köstermege isteymiz. Rusiyeniñ Ukrainağa qarşı istilâsı, Rusiyeniñ Qırım ilhaqı aqqında aytam. Qırımtatar bayrağı dünya boyunca seyaat etkende bizler toqtağan er yerimizde Qırımda insan aqları bozulğanını, Rusiye repressiv maşinasınıñ işğal altındaki Qırımda yapqanlarını tarif ettik. Bu vazifeni muvafaqiyetnen becerdik», – dep ayta Krutsık.
Bayraq Avrasiya, Şimaliy Amerika, Afrika, Avstraliyada oldı. Bayraq halqara teşkilâtlarnıñ ofisleri yerleşken dünyanıñ siyasiy paytahtları – New York, Brüssel, Viyana, Berlinni – ziyaret etti, dep qayd etti Krutsık.
ABDde ukrain diasporasını temsil etken İlona Dorfler Azatlıq Radiosınıñ mühbirine dünya paytahtlarınıñ «yüksek odalarında» «Ukraina menfaatlarını» temsil etmek içün bunıñ kibi aktsiyalar ne qadar müim olğanını aytıp berdi.
«Bıltır Washingtonda Ukraina bayrağını qabul etip imzalağanda ve bu sene LIBERATECRIMEA aktsiyasında bayraqlarnı tek Washingtonda yaşağan ukrain ve qırımtatarlar imzalamadı – bayraqlarnı çeşit teşkilâtlarnıñ temsilcileri imzalağan edi. Qırımtatarlar Ukraina vatandaşları, Qırım em tarih, em medeniyet ceetinden Ukraina olğanını hatırlattıq», – dep qayd etti Dorfler.
Ukraina-Avstriya medeniy-tasil merkeziniñ halqara yöneliş faaliyetiniñ koordinatorı İoanna Beytan qırımtatar bayrağınıñ OSCE Daimiy şurasınıñ toplaşuvı vaqtında Viyana ziyareti aqqında bildirdi.
«Anda Ukrainanıñ halqara teşkilâtlardaki Viyana daimiy vekili İgor Prokopçuk çıqışta bulundı, o, aktsiyamız, Rusiye akimiyeti işğal etken Qırımda qırımtatarlarğa yapılğan basqı aqqında tarif etti. Biz maqsadımızğa iriştik, dep tüşünemiz – OSCE bu aktsiya aqqında haberni resmiy saytta derc etti», – dep ayttı jurnalistlerge Beytan.
Qırımtatar Milliy Meclisiniñ reisi, Ukraina halq deputatı Refat Çubarov «Qırım meselesini kün tertibinde tutmaq» içün faal, siyasetçi ve intellektuallarnıñ bir olması müim, dep qayd etti.
«Böyle aktsiyalar Rusiyeni halqara teşkilâtlarğa qaytarmağa azır olğan diger memleketlerniñ siyasetçilerine vatandaşlarnıñ bir qısmı Rusiye içün adım atmağa razı olmaycağını köstere», – dep qayd etti Çubarov.
Böyle aktsiyalar Rusiyeni halqara teşkilâtlarğa qaytarmağa azır olğan diger memleketlerniñ siyasetçilerine vatandaşlarnıñ bir qısmı Rusiye içün adım atmağa razı olmaycağını köstereRefat Çubarov
«Bayraqnen birleşkenler - #LIBERATECRIMEA» aktsiyası qırımtatarlar, işğal etilgen Qırımda «Ukrainanı yüreginde tutıp» yaşağan er kes içün pek müim, dep qayd etti Qırımtatar resurs merkeziniñ idare reisi, aktsiyanıñ Ukraina koordinatorı Eskender Bariyev. O, Azatlıq Radiosı ile subette şunı qayd etti: «Bu aktsiya Qırımdaki semetdeşlerimiz içün müim – olar işğalcinen bir özü qalmağanını, on biñlernen insan qırımtatar halqı ve Ukrainağa birdemlik kösterip, olarnıñ aqlarını qorçalamağa azır olğanını körmek kerekler».
Malümat: «Bayraqnen birleşkenler - #LIBERATECRIMEA» aktsiyasını ilk sefer 2018 senesi oktâbr ayında LIBERATECRIMEA Qırımnı işğalden qurtaruv ve qırımtatar halqı ile birdemlik halqara cemaat areketiniñ faalleri keçirgen edi. Bu aktsiya çerçivesinde qırımtatar halqınıñ milliy bayrağı 9 ay devamında dünyanı dolaşıp, iyünniñ 24-nde Ukrainağa qayttı. Bayraq dünyanıñ 28 memleketine bardı – Avstraliya, ABD, Kanada, Malayziya, İrlandiya, Büyük Britaniya, Portugaliya, İspaniya, Frenkistan, Lüksemburg, Belçika, Almaniya, Çeh Cumhuriyeti, Slovakiya, Poloniya, İsveçiya, İsviçre, Finlândiya, Estoniya, Latviya, Litvaniya, Avstriya, Bulğaristan, İtaliya, Tunis, Mısır, İsrail ve Türkiyege.
Bu memleketlerniñ şeerlerinde aktsiya iştirakçileri qırımlılar ile birdemlik flashmoblarını keçirip, halqara cemaatçılıqnı yarımadada insan aqları bozulğanından haberdar etmege tırıştı. Aktsiyalar vaqtında Rusiyeden Qırımnı işğalden azat etmesi ve zapt etilgen ukrainalı arbiy deñizcilerni azat etmesi talap etildi.
İyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın renkli tamğa tasvir etilgen kök renkli bir bayraqtır.
Qırımda, esas Ukrainada ve dünyanıñ diger memleketlerinde bayram tedbirleriniñ keçirilmesi planlaştırıla.
Azatlıq Radiosı
Metniñ aslı – Azatlıq Radiosı saytında
